കൊൽക്കത്ത: പശ്ചിമബംഗാളിൽ ബുധനാഴ്ച നടക്കുന്ന അവസാനഘട്ട വോട്ടെടുപ്പിന് മുന്നോടിയായി സംസ്ഥാനത്ത് വ്യാപകമായ സുരക്ഷാ പരിശോധനകൾ ആരംഭിച്ചു. തിരഞ്ഞെടുപ്പ് കമ്മീഷന്റെയും സംസ്ഥാന പോലീസ് മേധാവിയുടെയും പ്രത്യേക നിർദ്ദേശപ്രകാരം ‘സ്പെഷ്യൽ ബോംബ് ഡ്രൈവ്’ എന്ന പേരിലാണ് പരിശോധനകൾ നടക്കുന്നത്. 24 പർഗനാസ്, മുർഷിദാബാദ്, ഭവാനിപ്പൂർ തുടങ്ങിയ സംഘർഷസാധ്യതയുള്ള പ്രദേശങ്ങളിലാണ് വീടുകൾ കേന്ദ്രീകരിച്ച് പരിശോധന ശക്തമാക്കിയത്.
പരിശോധനയ്ക്കിടെ 24 പർഗനാസിലെ ഒരു വീട്ടിൽ നിന്ന് നൂറിലധികം നാടൻ ബോംബുകൾ കണ്ടെത്തിയതായി പോലീസ് അറിയിച്ചു. ഇത് ഒരു തൃണമൂൽ കോൺഗ്രസ് പ്രവർത്തകന്റെ വീടാണെന്നതാണ് പ്രാഥമിക വിവരം. സൗത്ത് 24 പർഗനാസിലെ മറ്റൊരു സ്ഥലത്ത് നിന്ന് 79 ബോംബുകളും പിടിച്ചെടുത്തിട്ടുണ്ട്. ഈ സംഭവങ്ങളുമായി ബന്ധപ്പെട്ട എല്ലാ കേസുകളും ദേശീയ അന്വേഷണ ഏജൻസിക്ക് കൈമാറാൻ തിരഞ്ഞെടുപ്പ് കമ്മീഷൻ നിർദ്ദേശം നൽകിയിട്ടുണ്ട്.
രണ്ടാംഘട്ട പോളിംഗ് നടക്കുന്ന 142 മണ്ഡലങ്ങളിലും കർശന സുരക്ഷയാണ് ഏർപ്പെടുത്തിയിരിക്കുന്നത്. കഴിഞ്ഞ ദിവസങ്ങളിലുണ്ടായ സംഘർഷങ്ങളുടെ പശ്ചാത്തലത്തിലാണ് നടപടി ശക്തമാക്കിയത്. അതീവ പ്രാധാന്യമുള്ള പ്രദേശങ്ങളിൽ കേന്ദ്രസേനയുടെയും സംസ്ഥാന പോലീസിന്റെയും കാവൽ ഇരട്ടിയാക്കിയിട്ടുണ്ട്.
ഇതിനിടയിൽ, പരസ്യപ്രചാരണം ഇന്ന് വൈകുന്നേരത്തോടെ അവസാനിക്കും. വിവിധ രാഷ്ട്രീയ പാർട്ടികളുടെ അവസാനഘട്ട റാലികളും റോഡ് ഷോകളും ശക്തമായ സുരക്ഷാ സംവിധാനങ്ങളോടെയാണ് നടക്കുന്നത്. പ്രധാന നേതാക്കളുടെ പരിപാടികളിൽ വലിയ ജനപങ്കാളിത്തം റിപ്പോർട്ട് ചെയ്യപ്പെടുമ്പോൾ, തിരഞ്ഞെടുപ്പ് വേദിയിൽ ആവേശവും സംഘർഷാവസ്ഥയും ഒരേസമയം നിലനിൽക്കുകയാണ്.
