നമ്മുടെ വസ്ത്രങ്ങൾ കഴുകി വൃത്തിയാക്കാൻ ഉപയോഗിക്കുന്ന വാഷിങ് മെഷീൻ എപ്പോഴും ശുദ്ധമായിരിക്കുമെന്നാണ് പൊതുവായ ധാരണ. വസ്ത്രങ്ങൾ ഉള്ളിലിടുക, സ്വിച്ച് ഓൺ ചെയ്യുക, ഒടുവിൽ അലക്കി ഉണക്കിയെടുത്ത തുണികൾ പുറത്തെടുക്കുക എന്നതിലുപരി മെഷീന്റെ ഉൾഭാഗത്തെക്കുറിച്ച് നമ്മളാരും കാര്യമായി ചിന്തിക്കാറില്ല. എന്നാൽ മാസങ്ങളോളം വൃത്തിയാക്കാത്ത ഒരു മെഷീന്റെ റബ്ബർ സീലിനടിയിലോ ഡിറ്റർജന്റ് ഡ്രോയറിലോ ഒന്ന് പരിശോധിച്ചാൽ അവിടെ അടിഞ്ഞുകൂടിയിരിക്കുന്ന തവിട്ടുനിറത്തിലുള്ള അഴുക്കും കറുത്ത പാടുകളും കാണാം. പുറമെ നിന്ന് നോക്കിയാൽ മെഷീൻ തിളങ്ങുന്നുണ്ടാകാം, വസ്ത്രങ്ങൾക്ക് നല്ല മണമുണ്ടാകാം, എങ്കിലും ഉൾഭാഗത്ത് വളരുന്ന ബാക്ടീരിയകളുടെയും ഫംഗസുകളുടെയും ഒരു വലിയ ലോകം നമ്മൾ തിരിച്ചറിയാതെ പോകുകയാണ് ചെയ്യുന്നത്. മെഷീന്റെ ഉൾഭാഗം കൃത്യമായി പരിപാലിച്ചില്ലെങ്കിൽ അത് ഗുരുതരമായ ആരോഗ്യപ്രശ്നങ്ങൾക്ക് വഴിവെക്കുമെന്ന് ശാസ്ത്രീയ പഠനങ്ങൾ വ്യക്തമാക്കുന്നു.
‘ഫ്രോണ്ടിയേഴ്സ് ഇൻ മൈക്രോബയോളജി’ എന്ന ജേണലിൽ പ്രസിദ്ധീകരിച്ച പഠനപ്രകാരം, സാധാരണ ഗതിയിലുള്ള അലക്കൽ രീതികൾ കൊണ്ട് പല ബാക്ടീരിയകളും ഫംഗസുകളും നശിക്കുന്നില്ല എന്നതാണ് വസ്തുത. വസ്ത്രങ്ങളിലെ വിയർപ്പ്, മൃതകോശങ്ങൾ, അഴുക്ക്, സോപ്പുപൊടിയുടെ അവശിഷ്ടങ്ങൾ എന്നിവയെല്ലാം അലക്കുമ്പോൾ വെള്ളത്തിൽ കലരുന്നു. അലക്കൽ കഴിയുമ്പോൾ ഈ അഴുക്കു കലർന്ന വെള്ളത്തിന്റെ ഒരു ഭാഗം മെഷീന്റെ ഉൾഭാഗങ്ങളിൽ പറ്റിപ്പിടിക്കുന്നു. പ്രത്യേകിച്ചും മെഷീന്റെ റബ്ബർ സീലുകളിലും ഡ്രമ്മിനുള്ളിലും ഇവ അടിഞ്ഞുകൂടുന്നു. ഇത് പൂർണ്ണമായും ഉണങ്ങുന്നില്ല എന്ന് മാത്രമല്ല, അതിലെ സൂക്ഷ്മാണുക്കളെ നശിപ്പിക്കാൻ പാകത്തിന് നനവ് ഇല്ലാതാകുന്നുമില്ല. ഓരോ തവണ അലക്കുമ്പോഴും കൂടുതൽ അഴുക്ക് ഇതിലേക്ക് വന്നുചേരുകയും ആഴ്ചകളോ മാസങ്ങളോ കഴിയുമ്പോൾ മെഷീനുള്ളിൽ അഴുക്കിന്റെ ഒരു പാളി തന്നെ രൂപപ്പെടുകയും ചെയ്യുന്നു. ഈർപ്പമുള്ള അന്തരീക്ഷത്തിൽ ബാക്ടീരിയകൾ അതിവേഗം വളരുകയും അടുത്ത തവണ അലക്കുമ്പോൾ ശുദ്ധമായ വസ്ത്രങ്ങളിലേക്ക് പകരുകയും ചെയ്യുന്നു.
നമ്മൾ സാധാരണയായി പണം ലാഭിക്കാനോ വസ്ത്രങ്ങൾ കേടുപടാതിരിക്കാനോ തണുത്ത വെള്ളത്തിലാണ് അലക്കാറുള്ളത്. കൂടാതെ അലക്കി കഴിഞ്ഞാലുടൻ മെഷീന്റെ വാതിൽ അടച്ചിടുന്ന ശീലവുമുണ്ട്. ഈ രണ്ട് കാര്യങ്ങളും സൂക്ഷ്മാണുക്കൾക്ക് വളരാൻ ഏറ്റവും അനുകൂലമായ സാഹചര്യമാണ് ഒരുക്കുന്നത്. സാധാരണഗതിയിൽ ഇത് ആരോഗ്യവാനായ ഒരാളെ പെട്ടെന്ന് രോഗിയാക്കില്ലെങ്കിലും, എക്സിമ പോലുള്ള ചർമ്മരോഗങ്ങളോ, ചെറിയ മുറിവുകളോ, അതീവ സെൻസിറ്റീവായ ചർമ്മമോ ഉള്ളവരിൽ അസ്വസ്ഥതകൾ വർധിപ്പിക്കാൻ ഇത് കാരണമാകും. വസ്ത്രങ്ങൾ ഉണങ്ങിക്കഴിഞ്ഞാലും അവയിൽ നിന്ന് മാറാത്ത ഒരുതരം വല്ലാത്ത മണം വരുന്നത് ഇത്തരം ബാക്ടീരിയകളുടെ സാന്നിധ്യം മൂലമാണ്. അതിനാൽ തന്നെ വാഷിങ് മെഷീന്റെ വൃത്തിയുടെ കാര്യത്തിൽ പ്രത്യേക ശ്രദ്ധ അത്യാവശ്യമാണ്.
വാഷിങ് മെഷീന്റെ വാതിലിനോട് ചേർന്നുള്ള റബ്ബർ സീലിനടിയിലാണ് ഏറ്റവും കൂടുതൽ പൂപ്പൽ കാണപ്പെടുന്നത്. ഇടയ്ക്കിടെ നേർപ്പിച്ച വിനാഗിരിയോ ക്ലീനറോ ഉപയോഗിച്ച് ഈ ഭാഗം തുടച്ചു വൃത്തിയാക്കണം. കൂടാതെ അലക്കൽ കഴിഞ്ഞാലുടൻ മെഷീന്റെ വാതിൽ അടയ്ക്കാതെ കുറഞ്ഞത് ഒരു മണിക്കൂറെങ്കിലും തുറന്നിടുന്നത് ഉള്ളിലെ ഈർപ്പം ഉണങ്ങാനും പൂപ്പൽ വളരുന്നത് തടയാനും സഹായിക്കും. അതുപോലെ തന്നെ മാസത്തിലൊരിക്കലെങ്കിലും വസ്ത്രങ്ങളില്ലാതെ മെഷീൻ ഹോട്ട് സൈക്കിളിൽ പ്രവർത്തിപ്പിക്കുന്നത് വളരെ ഗുണകരമാണ്. ഉയർന്ന താപനിലയിലുള്ള വെള്ളം ഉള്ളിലെ അദൃശ്യമായ ബാക്ടീരിയകളെയും അടിഞ്ഞുകൂടിയ അഴുക്കിനെയും നശിപ്പിക്കാൻ സഹായിക്കും. ടവലുകളും ബെഡ്ഷീറ്റുകളും ഇടയ്ക്കിടെ ഹോട്ട് വാഷ് ചെയ്യുന്നത് വിയർപ്പും അഴുക്കും പൂർണ്ണമായും നീക്കം ചെയ്യാൻ സഹായിക്കും.
ഡിറ്റർജന്റ് ഡ്രോയറുകളും ഫിൽട്ടറുകളും വൃത്തിയാക്കുന്ന കാര്യത്തിൽ നമ്മൾ പലപ്പോഴും ഉദാസീനത കാട്ടാറുണ്ട്. ഡിറ്റർജന്റ് ഡ്രോയറിനുള്ളിൽ കട്ടിപിടിച്ചിരിക്കുന്ന സോപ്പ് അവശിഷ്ടങ്ങൾ ഫംഗസുകൾക്ക് വളരാൻ പറ്റിയ ഇടമാണ്. ഇത് ഇടയ്ക്കിടെ പുറത്തെടുത്ത് ചൂടുവെള്ളത്തിൽ കഴുകി വൃത്തിയാക്കണം. അതുപോലെ മെഷീന്റെ താഴെയുള്ള ഫിൽട്ടറും മാസത്തിലൊരിക്കൽ പരിശോധിക്കണം. വസ്ത്രങ്ങളുടെ പോക്കറ്റിൽ നിന്ന് വീഴുന്ന ചെറിയ സാധനങ്ങളോ ടിഷ്യു പേപ്പറോ ഫിൽട്ടറിൽ കുടുങ്ങി വെള്ളം കെട്ടിക്കിടന്നാൽ അത് വലിയ രീതിയിലുള്ള ദുർഗന്ധമുണ്ടാകാനും ബാക്ടീരിയകൾ പെരുകാനും കാരണമാകും. ഇത്തരം കാര്യങ്ങളിൽ അല്പം ശ്രദ്ധ പുലർത്തുന്നത് വസ്ത്രങ്ങളുടെയും മെഷീന്റെയും ആയുസ്സ് വർധിപ്പിക്കുമെന്ന് മാത്രമല്ല, കുടുംബത്തിന്റെ ആരോഗ്യം സംരക്ഷിക്കുന്നതിലും പ്രധാനമാണ്. പുറമെ കാണുന്ന തിളക്കത്തേക്കാൾ ഉപരിയായി വാഷിങ് മെഷീന്റെ ഉൾഭാഗം ശുദ്ധമായി സൂക്ഷിക്കുന്നത് ഒരു ആരോഗ്യകരമായ ജീവിതശൈലിയുടെ ഭാഗമായി കാണേണ്ടതുണ്ട്.
