അലഹബാദ്:മൂന്നുമാസത്തോളം യുവാവിനെ നിയമവിരുദ്ധമായി തടങ്കലിൽ വെച്ച സംഭവത്തിൽ ഉത്തർപ്രദേശ് സർക്കാരിന് കനത്ത തിരിച്ചടിയുമായി അലഹബാദ് ഹൈക്കോടതി രംഗത്തെത്തിയിരിക്കുകയാണ്. ഭരണഘടനാപരമായ അവകാശങ്ങൾ ലംഘിക്കപ്പെട്ടുവെന്ന് കണ്ടെത്തിയ കോടതി, സംസ്ഥാന സർക്കാരിന് 10 ലക്ഷം രൂപ പിഴ ചുമത്തിക്കൊണ്ട് ഉത്തരവിട്ടു. ജസ്റ്റിസ് അബ്ദുൽ മോയിൻ, ജസ്റ്റിസ് പ്രമോദ് കുമാർ ശ്രീവാസ്തവ എന്നിവരടങ്ങിയ ഡിവിഷൻ ബെഞ്ചാണ് ഹേബിയസ് കോർപ്പസ് ഹരജി പരിഗണിക്കവെ ഈ നിർണ്ണായക വിധി പുറപ്പെടുവിച്ചത്. 2026 ജനുവരി 27 മുതൽ ഏപ്രിൽ 29 വരെ നീണ്ടുനിന്ന തടവുശിക്ഷ പൂർണ്ണമായും അന്യായമാണെന്നും സുപ്രീം കോടതിയുടെ മാർഗ്ഗനിർദ്ദേശങ്ങൾ കാറ്റിൽ പറത്തിക്കൊണ്ടുള്ള നടപടിയാണെന്നും ഹൈക്കോടതി നിരീക്ഷിച്ചു.
അറസ്റ്റ് ചെയ്യപ്പെടുന്ന ഏതൊരു വ്യക്തിയെയും അതിന്റെ കൃത്യമായ കാരണങ്ങൾ ബോധ്യപ്പെടുത്താതെ കസ്റ്റഡിയിൽ വെക്കാൻ പാടില്ലെന്ന മിഹിർ രാജേഷ് ഷാ കേസിലെ സുപ്രീംകോടതി ഉത്തരവും ഭരണഘടനയുടെ ആർട്ടിക്കിൾ 22(1) പ്രകാരമുള്ള മൗലികാവകാശങ്ങളും ഈ സംഭവത്തിൽ ലംഘിക്കപ്പെട്ടതായി കോടതി കണ്ടെത്തി. അറസ്റ്റ് മെമോയിൽ കേസ് നമ്പർ മാത്രമാണ് രേഖപ്പെടുത്തിയിരുന്നതെന്നും അറസ്റ്റ് ചെയ്യാനുള്ള ശരിയായ കാരണങ്ങൾ വ്യക്തമായിരുന്നില്ലെന്നും ചൂണ്ടിക്കാട്ടിയ കോടതി, നിയമവിരുദ്ധമായ ഈ അറസ്റ്റിനെ അടിസ്ഥാനമാക്കി മജിസ്ട്രേറ്റ് പുറപ്പെടുവിച്ച റിമാൻഡ് ഉത്തരവും റദ്ദാക്കാൻ ബാധ്യസ്ഥമാണെന്ന് വ്യക്തമാക്കി.
കേസിലെ ഉന്നത ഉദ്യോഗസ്ഥരുടെ ഭാഗത്തുനിന്നുണ്ടായ ഗൗരവമില്ലാത്ത സമീപനത്തെ കോടതി രൂക്ഷമായി വിമർശിച്ചു. ആഭ്യന്തര വകുപ്പിലെ അഡീഷണൽ ചീഫ് സെക്രട്ടറി സമർപ്പിച്ച സത്യവാങ്മൂലത്തിൽ കോടതി വിശദീകരണം ചോദിച്ചിട്ടും എന്തുകൊണ്ട് പിഴ ചുമത്തരുത് എന്നതിനെക്കുറിച്ച് ഒരക്ഷരം പോലും സൂചിപ്പിക്കാത്തതിൽ കോടതി കടുത്ത അതൃപ്തി രേഖപ്പെടുത്തി. സംസ്ഥാനത്തെ ഏറ്റവും ഉയർന്ന ഉദ്യോഗസ്ഥരിൽ നിന്ന് ഇത്തരമൊരു നിലപാടുണ്ടാകുന്നത് മറ്റ് അധികാരികളുടെ പ്രവർത്തനങ്ങളെക്കുറിച്ച് വലിയ ആശങ്കയുണ്ടാക്കുന്നുണ്ടെന്ന് കോടതി കുറ്റപ്പെടുത്തി. കോടതിയുടെ മുൻ ഉത്തരവുകൾ ഉണ്ടായിട്ടും നടപടിയെടുക്കാത്തത് ഹരജിക്കാരന്റെ തടവ് നീണ്ടുപോകാൻ കാരണമായെന്നും ഇത് മാപ്പർഹിക്കാത്ത കുറ്റമാണെന്നും കോടതി പറഞ്ഞു.
മൂന്നുമാസത്തിലധികം നീണ്ടുനിന്ന ഈ നിയമവിരുദ്ധ തടവിനെതിരെ മാതൃകാപരമായ ശിക്ഷ ആവശ്യമാണെന്ന് കണ്ടാണ് 10 ലക്ഷം രൂപ നഷ്ടപരിഹാരം നൽകാൻ കോടതി ഉത്തരവിട്ടത്. നാല് ആഴ്ചയ്ക്കുള്ളിൽ ഈ തുക ഹരജിക്കാരന് നൽകണം. നഷ്ടപരിഹാര തുക ആദ്യം സംസ്ഥാന സർക്കാർ നൽകണമെന്നും പിന്നീട് ഈ വീഴ്ചയ്ക്ക് കാരണക്കാരായ ഉദ്യോഗസ്ഥരെ കണ്ടെത്തി അവരിൽ നിന്ന് നിയമപരമായി ഈ തുക ഈടാക്കാമെന്നും അലഹബാദ് ഹൈക്കോടതി വ്യക്തമാക്കി. പൗരന്റെ വ്യക്തിസ്വാതന്ത്ര്യത്തിന്മേലുള്ള കടന്നുകയറ്റത്തിന് സർക്കാർ കനത്ത വില നൽകേണ്ടി വരുമെന്ന ഓർമ്മപ്പെടുത്തൽ കൂടിയാണ് ഈ വിധി.
