കൊച്ചി: നിയമസഭ തെരഞ്ഞെടുപ്പിലെ കനത്ത തോൽവിക്ക് പിന്നാലെ സിപിഎം സംസ്ഥാന സെക്രട്ടറി എം.വി. ഗോവിന്ദനെതിരെ സാമൂഹിക മാധ്യമങ്ങളിൽ രൂക്ഷ വിമർശനം ഉയർന്നു. തിരഞ്ഞെടുപ്പ് പരാജയവുമായി ബന്ധപ്പെട്ട് സിപിഎം സംസ്ഥാന സെക്രട്ടറിയേറ്റ് പുറത്തിറക്കിയ പ്രസ്താവന പങ്കുവെച്ച എം.വി. ഗോവിന്ദന്റെ ഫെയ്സ്ബുക്ക് പോസ്റ്റിന് താഴെയാണ് പാർട്ടി അനുകൂലികളെന്നു കരുതപ്പെടുന്ന അക്കൗണ്ടുകളിൽനിന്ന് പോലും കടുത്ത പ്രതികരണങ്ങൾ വന്നത്.
2021ൽ 67 സീറ്റുകൾ നേടിയ സിപിഎം ഇത്തവണ 26 സീറ്റുകളിലേക്ക് ഇടിഞ്ഞുവെന്ന വിവരമാണ് ചർച്ചകൾക്ക് ആക്കം കൂട്ടിയത്. തോൽവി അപ്രതീക്ഷിതമാണെന്നും പിഴവുകൾ അംഗീകരിച്ച് തിരുത്തൽ നടപടികൾ സ്വീകരിക്കുമെന്നും സിപിഎം സംസ്ഥാന സെക്രട്ടറിയേറ്റ് പ്രസ്താവനയിൽ വ്യക്തമാക്കിയിരുന്നു. ഈ പ്രസ്താവന പങ്കുവെച്ച പോസ്റ്റിനോടാണ് വ്യാപകമായ വിമർശനം ഉയർന്നത്.
പാർട്ടി സെക്രട്ടറി സ്ഥാനത്ത് നിന്ന് എം.വി. ഗോവിന്ദൻ മാറിനിൽക്കണമെന്ന ആവശ്യമാണ് ഭൂരിഭാഗം കമന്റുകളിലും ഉയർന്നത്. എം. സ്വരാജ്, പി. ജയരാജൻ എന്നിവരെ പുതിയ നേതൃത്വത്തിലേക്ക് കൊണ്ടുവരണമെന്ന നിർദേശങ്ങളും ചിലർ മുന്നോട്ടുവച്ചു. നിലവിലെ നേതൃത്വത്തിൽ പാർട്ടിക്ക് തിരിച്ചടി നേരിട്ടുവെന്ന വിലയിരുത്തലുകളും കമന്റുകളിൽ പ്രതിഫലിച്ചു.
തളിപ്പറമ്പിൽ ഭാര്യ പി.കെ. ശ്യാമളയ്ക്ക് സീറ്റ് ഉറപ്പിച്ചതടക്കമുള്ള വിഷയങ്ങളും വിമർശകർ ഉയർത്തി. “പാർട്ടി ജനങ്ങൾ അംഗീകരിക്കുന്ന നേതാക്കളെ മുന്നിൽ കൊണ്ടുവരണം” എന്ന തരത്തിലുള്ള അഭിപ്രായങ്ങളും പോസ്റ്റിന് താഴെ നിറഞ്ഞു. ബംഗാളിലെപ്പോലെ സിപിഎമ്മിന് പിന്നോട്ടുപോക്കുണ്ടാകുമെന്ന മുന്നറിയിപ്പുകളും ചില കമന്റുകളിൽ പ്രത്യക്ഷപ്പെട്ടു.
