ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ രൂക്ഷ വിമർശനവുമായി കോൺഗ്രസ് അധ്യക്ഷൻ മല്ലികാർജുൻ ഖർഗെ. ഗ്യാനേഷ് കുമാർ മോദി സർക്കാരിന്റെ ‘കളിപ്പാവയായി’ മാറിയെന്നാണ് ഖർഗെ ആരോപിച്ചത്. കോൺഗ്രസ് പ്രവർത്തക സമിതി യോഗത്തിലായിരുന്നു അദ്ദേഹത്തിന്റെ വിമർശനം.
ജനാധിപത്യവും ഭരണഘടനയും സംരക്ഷിക്കാനുള്ള ഉത്തരവാദിത്തം കോൺഗ്രസിനുണ്ടെന്ന് ഖർഗെ പറഞ്ഞു. വോട്ടർ പട്ടികയിലെ മാറ്റങ്ങളുമായി ബന്ധപ്പെട്ട് തെരഞ്ഞെടുപ്പ് കമ്മീഷനെതിരെ കോൺഗ്രസ് ഉന്നയിക്കുന്ന ആരോപണങ്ങളും അദ്ദേഹം യോഗത്തിൽ ആവർത്തിച്ചു.
പ്രത്യേക തീവ്ര വോട്ടർപട്ടിക പരിഷ്കരണമായ (SIR) നടപടിയുമായി ബന്ധപ്പെട്ട് തെരഞ്ഞെടുപ്പ് കമ്മീഷന്റെ പ്രവർത്തനത്തിൽ കൂടുതൽ സുതാര്യത വേണമെന്നാണ് കോൺഗ്രസിന്റെ ആവശ്യം. വോട്ടർ പട്ടികയിൽ വരുത്തിയ പ്രധാന മാറ്റങ്ങളുടെ പൂർണ വിവരങ്ങൾ പുറത്തുവിടണമെന്നും ഗുരുതരമായ ക്രമക്കേടുകൾക്ക് തെളിവുണ്ടെങ്കിൽ സ്വതന്ത്രവും സമയബന്ധിതവുമായ അന്വേഷണം നടത്തണമെന്നും കോൺഗ്രസ് ആവശ്യപ്പെട്ടിട്ടുണ്ട്.
അതേസമയം, തെരഞ്ഞെടുപ്പ് കമ്മീഷന്റെ തീരുമാനങ്ങൾ ഏകകണ്ഠമായിരുന്നുവെന്നാണ് കമ്മീഷൻ നേരത്തെ വ്യക്തമാക്കിയിട്ടുള്ളത്. എസ്ഐആറുമായി ബന്ധപ്പെട്ട തീരുമാനങ്ങൾ മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറും മറ്റ് രണ്ട് തെരഞ്ഞെടുപ്പ് കമ്മീഷണർമാരും ചേർന്നാണ് എടുത്തതെന്നും കമ്മീഷൻ അറിയിച്ചിരുന്നു.
ഗ്യാനേഷ് കുമാറിന്റെ രാജി ആവശ്യപ്പെട്ട് വിവിധ സംസ്ഥാനങ്ങളിൽ കോൺഗ്രസ് പ്രതിഷേധങ്ങളും സംഘടിപ്പിക്കുന്നുണ്ട്. തെരഞ്ഞെടുപ്പ് കമ്മീഷന്റെ പ്രവർത്തനവും വോട്ടർ പട്ടിക പരിഷ്കരണവും സംബന്ധിച്ച ആരോപണങ്ങൾ ദേശീയ രാഷ്ട്രീയത്തിൽ വലിയ ചർച്ചയായി തുടരുകയാണ്.
