തിരുവനന്തപുരം: ഗൂഗിൾ സെർച്ച് കഴിഞ്ഞ 25 വർഷത്തിനിടയിലെ ഏറ്റവും വലിയ മാറ്റത്തിലേക്ക് കടക്കുകയാണെന്ന് കമ്പനി പ്രഖ്യാപിച്ചു. ഗൂഗിൾ I/O 2026 സമ്മേളനത്തിലാണ് ഈ പ്രഖ്യാപനം നടത്തിയത്. ഇതുവരെ കീവേഡുകൾ ടൈപ്പ് ചെയ്ത് ലിങ്കുകൾ പരിശോധിക്കുന്ന രീതിയിലായിരുന്ന സെർച്ച് അനുഭവം ഇനി പൂർണമായും മാറുമെന്നാണ് കമ്പനി വ്യക്തമാക്കുന്നത്.
പുതിയ എഐ അധിഷ്ഠിത അപ്ഡേറ്റുകളിലൂടെ ഗൂഗിൾ സെർച്ച് ഒരു ചാറ്റ് പോലെയുള്ള ഇന്റലിജന്റ് അസിസ്റ്റന്റായി മാറുകയാണ് ലക്ഷ്യം. ഉപയോക്താക്കൾക്ക് ഇനി വെറും തിരച്ചിൽ ഫലങ്ങൾ മാത്രമല്ല, നേരിട്ട് മറുപടികളും പ്രവർത്തനങ്ങൾ നിർവഹിക്കുന്ന സംവിധാനങ്ങളും ലഭിക്കും. സെർച്ച് ഇനി വിവരങ്ങൾ കണ്ടെത്തുന്ന ഉപകരണം മാത്രമല്ല, പ്രവർത്തനം നിർവഹിക്കുന്ന സഹായിയായി മാറുമെന്നാണ് ആൽഫബറ്റ് വ്യക്തമാക്കുന്നത്.
‘എഐ മോഡ്’ എന്ന സംവിധാനത്തിന്റെ വിപുലീകരണമാണ് പ്രധാന മാറ്റങ്ങളിൽ ഒന്ന്. സ്വാഭാവിക ഭാഷയിൽ ചോദ്യങ്ങൾ ചോദിക്കാൻ കഴിയുന്ന ഈ സംവിധാനത്തിന് ഇതിനകം തന്നെ ഒരു ബില്യണിലധികം ഉപയോക്താക്കളുണ്ടെന്ന് ഗൂഗിൾ അവകാശപ്പെടുന്നു. പുതിയ പതിപ്പിൽ ജെമിനി 3.5 ഫ്ലാഷ് മോഡൽ ഡിഫോൾട്ടായി ഉപയോഗിക്കും.
ടെക്സ്റ്റ് മാത്രമല്ല, ചിത്രങ്ങൾ, വീഡിയോകൾ, ഫയലുകൾ, ക്രോം ടാബുകൾ എന്നിവയും ഉപയോഗിച്ച് തിരച്ചിൽ നടത്താൻ സാധിക്കും. മുൻപ് നൽകിയ മറുപടികൾ മെമ്മറിയിൽ സൂക്ഷിച്ച് തുടർചോദ്യങ്ങൾക്ക് കൂടുതൽ കൃത്യമായ മറുപടികൾ നൽകാനും സംവിധാനം ഒരുക്കുന്നു.
‘സെർച്ച് ഏജന്റ്സ്’ എന്ന പുതിയ ഫീച്ചർ ഉപയോക്താവിന് വേണ്ടി ഇന്റർനെറ്റ് നിരന്തരം നിരീക്ഷിച്ച് ആവശ്യമായ വിവരങ്ങൾ സ്വയം കണ്ടെത്തും. വീട് അന്വേഷിക്കൽ പോലുള്ള സാഹചര്യങ്ങളിൽ ലഭ്യമായ ഓപ്ഷനുകൾ തുടർച്ചയായി അറിയിക്കാനും ഇത് സഹായിക്കും.
ഇതോടൊപ്പം ‘ഏജന്റിക് ബുക്കിംഗ്’ സംവിധാനത്തിലൂടെ ഹോം സർവീസ്, ബ്യൂട്ടി, പെറ്റ് കെയർ തുടങ്ങിയ സേവനങ്ങൾ നേരിട്ട് ബുക്ക് ചെയ്യാൻ കഴിയും. ചില സാഹചര്യങ്ങളിൽ എഐ തന്നെ ബുക്കിംഗ് പൂർത്തിയാക്കുകയും ചെയ്യും. ഫിറ്റ്നസ് ട്രാക്കിംഗ്, യാത്രാ പ്ലാനിംഗ്, വിവാഹ ഒരുക്കങ്ങൾ തുടങ്ങിയവയ്ക്കായി ഇന്ററാക്ടീവ് ടൂളുകളും സെർച്ച് തന്നെ സൃഷ്ടിക്കും.
‘പേഴ്സണൽ ഇന്റലിജൻസ്’ ഫീച്ചർ ജിമെയിൽ, ഗൂഗിൾ ഫോട്ടോസ് തുടങ്ങിയ സേവനങ്ങളുമായി ബന്ധിപ്പിച്ച് കൂടുതൽ വ്യക്തിഗതമായ മറുപടികൾ നൽകും. ഈ മാറ്റങ്ങളിലൂടെ ഗൂഗിൾ സെർച്ച് ഒരു സാധാരണ സെർച്ച് എഞ്ചിനിൽ നിന്ന് പൂർണ്ണമായ എഐ സഹായിയായി മാറുമെന്നാണ് വിലയിരുത്തൽ.
