ന്യൂഡൽഹി: വടക്കുകിഴക്കൻ ഡൽഹിയിലെ മുസ്തഫാബാദിൽ നാലാം നിലയിലെ ഫ്ലാറ്റിൽ നിന്ന് വീണ് 25 വയസ്സുകാരിയായ ഗർഭിണി മരിച്ചു. സംഭവത്തിന് പിന്നാലെ യുവതിയെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ലെന്ന് പോലീസ് അറിയിച്ചു. മൂന്ന് മാസം മുൻപാണ് യുവതി പ്രണയിച്ച പുരുഷനെ വിവാഹം കഴിച്ചതെന്ന് പ്രാഥമിക അന്വേഷണത്തിൽ കണ്ടെത്തി.
എന്നാൽ വിവാഹത്തിന് ശേഷം ഒരു മാസത്തിനുള്ളിൽ തന്നെ ഭർത്താവും കുടുംബവും സ്ത്രീധനം ആവശ്യപ്പെട്ട് മാനസികമായി പീഡിപ്പിക്കാൻ തുടങ്ങിയെന്ന് യുവതിയുടെ കുടുംബം ആരോപിച്ചു. യുവതി നാലാം നിലയിൽ നിന്ന് വീണതാണെന്ന് കുടുംബാംഗങ്ങൾ പറയുന്നു. കഴിഞ്ഞ കുറച്ച് ദിവസങ്ങളായി വീട്ടിൽ തുടർച്ചയായി തർക്കങ്ങൾ നടന്നിരുന്നതായും അവർ അറിയിച്ചു.
“പ്രശ്നം പരിഹരിക്കാൻ ബന്ധുക്കൾ വീട്ടിൽ പോയിരുന്നു. അവൾ ഭർത്താവിന്റെ വീട്ടിൽ പീഡനം നേരിട്ടതായി നിരന്തരം പറഞ്ഞിരുന്നു” എന്ന് യുവതിയുടെ സഹോദരി പ്രതികരിച്ചു. ജീവൻ അപകടത്തിലാണെന്ന് യുവതി മുൻപ് തന്നെ പറഞ്ഞിരുന്നതായും അമ്മ ആരോപിച്ചു. സംഭവത്തിൽ അന്വേഷണം ആരംഭിച്ചിട്ടുണ്ടെന്ന് പോലീസ് അറിയിച്ചു. കുടുംബാംഗങ്ങളുടെ മൊഴികൾ രേഖപ്പെടുത്തി വരികയാണെന്നും, ലഭിക്കുന്ന വിവരങ്ങളുടെ അടിസ്ഥാനത്തിൽ തുടർനടപടികൾ സ്വീകരിക്കുമെന്നും പോലീസ് വ്യക്തമാക്കി.
