ജെറുസലേം: ഗാസയിലെ ഹമാസിന്റെ സായുധ വിഭാഗത്തിന്റെ പുതിയ മേധാവിയെ ഇസ്രായേൽ വ്യോമാക്രമണത്തിൽ വധിച്ചതായി ഇസ്രായേൽ സൈന്യം അവകാശപ്പെട്ടു. ഗാസ സിറ്റിയിലെ റിമാൽ മേഖലയിലുള്ള ഒരു ഫ്ലാറ്റിനെ ലക്ഷ്യമാക്കി നടത്തിയ ആക്രമണത്തിലാണ് ഇയാൾ കൊല്ലപ്പെട്ടതെന്നാണ് റിപ്പോർട്ട്.

കൊല്ലപ്പെട്ടത് അടുത്തിടെ ഈ സ്ഥാനത്ത് നിയമിതനായ മുഹമ്മദ് ഒഡേ ആണ്. മുൻ ഹമാസ് സൈനിക കമാൻഡർ ഇസ് അൽ-ദിൻ അൽ ഹദ്ദാദിന് ശേഷം അദ്ദേഹം ചുമതലയേറ്റതായും, ഒക്ടോബർ 7 ആക്രമണവുമായി ബന്ധപ്പെട്ട പ്രധാന നേതാക്കളിൽ ഒരാളായിരുന്നുവെന്നും ഇസ്രായേൽ പറയുന്നു.

ആക്രമണത്തിൽ ഒരു സ്ത്രീയടക്കം ആറുപേർ കൊല്ലപ്പെട്ടതായും ഇരുപതിലധികം പേർക്ക് പരിക്കേറ്റതായും റിപ്പോർട്ടുകൾ പറയുന്നു. രക്ഷാപ്രവർത്തനം ഇപ്പോഴും തുടരുകയാണ്.

അതേസമയം, ഹമാസ് ഔദ്യോഗികമായി ഇതിൽ പ്രതികരിച്ചിട്ടില്ല. പ്രദേശത്ത് ഇസ്രായേൽ ലെബനൻ, വെസ്റ്റ് ബാങ്ക് എന്നിവിടങ്ങളിലേക്കും സൈനിക നടപടികൾ വ്യാപിപ്പിക്കുന്ന സാഹചര്യത്തിലാണ് ഈ സംഭവം റിപ്പോർട്ട് ചെയ്യുന്നത്.