മുസാഫർനഗർ: ഉത്തർപ്രദേശിലെ മുസാഫർനഗറിലെ ഒരു സർക്കാർ ആശുപത്രിയിലെ ഡോക്ടർക്കെതിരെ ഗുരുതരമായ അഴിമതിയുടെയും ചികിത്സാ പിഴവിന്റെയും ആരോപണങ്ങൾ ഉയർന്നു. 14 വയസുള്ള മാനസിക വെല്ലുവിളി നേരിടുന്ന പെൺകുട്ടിയുടെ ചികിത്സയ്ക്കായി എത്തിയ അമ്മയിൽ നിന്ന് 25,000 രൂപ കൈക്കൂലി ആവശ്യപ്പെട്ടെന്നും, തുക നൽകാനാകാതെ വന്നതിനെ തുടർന്ന് കുട്ടിയുടെ പരിക്ക് ബോധപൂർവം വഷളാക്കിയെന്നും പരാതിയിൽ പറയുന്നു.
വിധവയായ രേഷ്മയുടെ മകൾക്ക് ഏകദേശം ആറാഴ്ച മുമ്പ് ജില്ലാ ആശുപത്രിയിൽ വലതുകാലിന് ശസ്ത്രക്രിയ നടത്തിയിരുന്നു. സർക്കാർ പദ്ധതിപ്രകാരം സൗജന്യമായി ലഭിക്കേണ്ട ചികിത്സയ്ക്കായി ആശുപത്രി ജീവനക്കാർ 25,000 രൂപ ആവശ്യപ്പെട്ടതായാണ് ആരോപണം. സാമ്പത്തിക ബുദ്ധിമുട്ടുകൾ കാരണം തുക നൽകാനാകാതിരുന്ന രേഷ്മ സഹായത്തിനായി ജില്ലാ മജിസ്ട്രേറ്റിനെ സമീപിച്ചു. തുടർന്ന് കുട്ടിക്ക് സൗജന്യ ചികിത്സ ഉറപ്പാക്കാൻ ചീഫ് മെഡിക്കൽ ഓഫീസർക്ക് നിർദേശം നൽകിയെങ്കിലും, ആശുപത്രി ജീവനക്കാർ പണം ആവശ്യപ്പെടുന്നത് തുടർന്നുവെന്നാണ് പരാതി. ഒടുവിൽ 8,000 രൂപ കൈപ്പറ്റിയ ശേഷമാണ് ചികിത്സ മുന്നോട്ടുപോയതെന്നും ആരോപണമുണ്ട്.
ശസ്ത്രക്രിയയ്ക്ക് ശേഷമുള്ള പരിശോധനയ്ക്കായി ആശുപത്രിയിലെത്തിയപ്പോഴാണ് സംഭവം നടന്നതെന്ന് രേഷ്മ പറയുന്നു. പരിശോധനയ്ക്കിടെ ഡോക്ടർ കുട്ടിയുടെ മുട്ട് ബലമായി മടക്കിയതിനെ തുടർന്ന് കുട്ടി വേദനകൊണ്ട് നിലവിളിച്ചെന്നും, ഒടിവുണ്ടാകുന്നതുപോലുള്ള ശബ്ദം കേട്ടെന്നും അവർ ആരോപിച്ചു. ഈ സംഭവത്തിന് ശേഷം കുട്ടിയുടെ കാലിന്റെ അവസ്ഥ കൂടുതൽ മോശമായതായും പരാതിയിൽ പറയുന്നു.
പ്രാദേശിക മാധ്യമ റിപ്പോർട്ടുകൾ പ്രകാരം, പെൺകുട്ടിക്ക് മാനസിക അസ്വാസ്ഥ്യങ്ങളും ഉണ്ട്. സംഭവത്തിൽ നീതി തേടി രേഷ്മ ജില്ലാ കളക്ടറേറ്റിൽ ഔദ്യോഗിക പരാതി സമർപ്പിച്ചിട്ടുണ്ട്. വിശദമായ അന്വേഷണം നടത്തി കുറ്റക്കാർക്കെതിരെ കർശന നടപടി സ്വീകരിക്കണമെന്നാണ് അവരുടെ ആവശ്യം.
അതേസമയം, പരാതിയിൽ പ്രതികരിച്ച ചീഫ് മെഡിക്കൽ ഓഫീസർ സുനിൽ തിവാരി, എല്ലാ വശങ്ങളും പരിശോധിക്കാതെ നിഗമനത്തിലെത്താനാകില്ലെന്ന് വ്യക്തമാക്കി. എന്നാൽ സംഭവത്തിൽ സമഗ്ര അന്വേഷണം നടത്തുമെന്നും, ചികിത്സാ വീഴ്ചയോ മോശം പെരുമാറ്റമോ മെഡിക്കൽ ചട്ടലംഘനമോ കണ്ടെത്തിയാൽ കർശന നിയമനടപടികൾ സ്വീകരിക്കുമെന്നും അദ്ദേഹം അറിയിച്ചു.
