റിയാദ്: ഉച്ചഭക്ഷണത്തിന് ശേഷം താമസസ്ഥലത്ത് ഉറങ്ങുന്നതിനിടയിലുണ്ടായ ഹൃദയാഘാതത്തെ തുടർന്ന് മലയാളി സൗദിയിൽ മരിച്ചു. കോട്ടയം കാഞ്ഞിരപ്പള്ളി ചോറ്റി സ്വദേശിയും നിലവിൽ പാറത്തോട് സ്ഥിരതാമസക്കാരനുമായ പുതുപ്പറമ്പിൽ ഷാഹുൽ ഹമീദ് (ഷാമോൻ – 50) ആണ് റിയാദിന് സമീപമുള്ള അൽഖർജ് മേഖലയിലെ ദിലത്തിൽ നിര്യാതനായത്.
ഉറക്കത്തിനിടയിൽ അസ്വസ്ഥത ശ്രദ്ധയിൽപ്പെട്ടതിനെ തുടർന്ന് ഒപ്പമുണ്ടായിരുന്ന ബന്ധുക്കളും സുഹൃത്തുക്കളും ചേർന്ന് ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
ചോറ്റി പുതുപ്പറമ്പിൽ മുഹമ്മദ്–നസീമ ദമ്പതികളുടെ മകനാണ്. കഴിഞ്ഞ 25 വർഷത്തോളം സൗദിയിൽ പ്രവാസിയായിരുന്ന അദ്ദേഹം കോവിഡ് കാലത്ത് നാട്ടിലേക്ക് മടങ്ങിയിരുന്നു. ഒരു വർഷം മുമ്പ് വീണ്ടും സൗദിയിൽ തിരിച്ചെത്തി പച്ചക്കറി വിപണന മേഖലയിലാണ് ജോലി ചെയ്തിരുന്നത്.
ഭാര്യ റമീസ ഷാഹുൽ (ഫൗസി), മക്കൾ യഹ്യ ഫാബി, ഫഹദ്. മൃതദേഹം നിയമനടപടികൾക്ക് ശേഷം നാട്ടിലേക്ക് കൊണ്ടുപോകുന്നതിനുള്ള ശ്രമങ്ങൾ സാമൂഹിക പ്രവർത്തകരുടെ നേതൃത്വത്തിൽ പുരോഗമിക്കുകയാണ്.
