ആലപ്പുഴ: ഉസ്ബെക്കിസ്ഥാനിലെ ബുഖാറ സ്റ്റേറ്റ് മെഡിക്കൽ സർവകലാശാലയിലെ ഒന്നാംവർഷ എംബിബിഎസ് വിദ്യാർത്ഥിനിയായ സാവരിയ ബസന്തിന്റെ കൊലപാതകക്കേസ് ക്രൈംബ്രാഞ്ചിന് കൈമാറി. ആഭ്യന്തരമന്ത്രി രമേശ് ചെന്നിത്തല ഹരിപ്പാട്ടിലെ സാവരിയയുടെ വസതിയിലെത്തി കുടുംബാംഗങ്ങളെ സന്ദർശിച്ച് അനുശോചനം രേഖപ്പെടുത്തി. പ്രതിക്കെതിരെ നിയമനടപടികൾ ശക്തമായി മുന്നോട്ടുകൊണ്ടുപോകുമെന്ന് മന്ത്രി കുടുംബത്തിന് ഉറപ്പ് നൽകി.
സംഭവവുമായി ബന്ധപ്പെട്ട് മലപ്പുറം പെരിന്തൽമണ്ണ സ്വദേശിയും സാവരിയയുടെ സഹപാഠിയുമായ സദറുൽ അനവിനെ ഉസ്ബെക്കിസ്ഥാൻ പൊലീസ് അറസ്റ്റ് ചെയ്തിട്ടുണ്ട്. ഇയാൾക്കെതിരെ കൊലപാതകക്കുറ്റം ചുമത്തി അന്വേഷണം തുടരുകയാണ്.
പോസ്റ്റ്മോർട്ടം റിപ്പോർട്ടിൽ തലച്ചോറിലുണ്ടായ രക്തസ്രാവമാണ് മരണകാരണമെന്ന് വ്യക്തമാക്കുന്നു. തലയ്ക്ക് പിന്നിൽ രണ്ട് തവണ മർദനമേറ്റതിന്റെ അടയാളങ്ങളും നട്ടെല്ലിന് ക്ഷതവും കണ്ടെത്തി. ശരീരത്തിന്റെ പുറത്തും വയറിലും ചവിട്ടേറ്റ പാടുകളും രേഖപ്പെടുത്തിയിട്ടുണ്ട്. ആന്തരിക അവയവങ്ങൾ ഫോറൻസിക് പരിശോധനയ്ക്ക് അയച്ചിരിക്കുകയാണ്. പരിശോധനാഫലം ലഭിച്ചശേഷം വിശദമായ പോസ്റ്റ്മോർട്ടം റിപ്പോർട്ട് പുറത്തുവിടും.
ജൂലൈ മൂന്നിനാണ് ബുഖാറയിലെ കോളേജ് ഹോസ്റ്റലിൽ സാവരിയ മരിച്ച നിലയിൽ കണ്ടെത്തിയത്. ഹരിപ്പാട് പിലാപ്പുഴ പുതുക്കാട്ട് സുപ്രഭ ഭവനിൽ ബസന്ത്–മിനി സുപ്രഭ ദമ്പതികളുടെ മകളാണ് സാവരിയ.
സഹപാഠികൾ ബുഖാറ പൊലീസിന് നൽകിയ മൊഴിയിൽ, പ്രതി മുമ്പും സാവരിയയെ ശാരീരികമായി ഉപദ്രവിച്ചിരുന്നുവെന്ന വിവരം ഉൾപ്പെട്ടിട്ടുണ്ട്. സംഭവദിവസം സാവരിയ താഴെ വീണതാണെന്ന് പറഞ്ഞാണ് പ്രതി ആശുപത്രിയിലെത്തിച്ചതെന്നും പിന്നീട് അന്വേഷണത്തിലാണ് ദുരൂഹതകൾ പുറത്തുവന്നതെന്നും പൊലീസ് അറിയിച്ചു.
ഇന്ത്യയും ഉസ്ബെക്കിസ്ഥാനും തമ്മിലുള്ള നയതന്ത്ര കരാർ പ്രകാരം പ്രതിയും ഇരയും ഇന്ത്യൻ പൗരന്മാരായതിനാൽ കേസ് ഇന്ത്യയിലേക്ക് കൈമാറാൻ ആവശ്യപ്പെടാനുള്ള സാധ്യതയുണ്ട്. അത്തരമൊരു തീരുമാനം ഉണ്ടായാൽ വിചാരണ ഉൾപ്പെടെയുള്ള നടപടികൾ കേരളത്തിൽ നടത്താനാണ് സാധ്യത. പ്രതിയുടെ കുടുംബവും വിചാരണ കേരളത്തിൽ തന്നെ നടക്കണമെന്നാണ് ആവശ്യപ്പെട്ടിരിക്കുന്നത്.
