കോഴിക്കോട്: കാഫിർ സ്‌ക്രീൻഷോട്ട് കേസിൽ ഡിവൈഎഫ്‌ഐ നേതാവ് റിബേഷ് രാമകൃഷ്ണന് കോഴിക്കോട് ജില്ലാ സെഷൻസ് കോടതി മുൻകൂർ ജാമ്യം അനുവദിച്ചു. കേസിൽ പ്രതിയാക്കപ്പെടാൻ സാധ്യതയുണ്ടെന്ന് ചൂണ്ടിക്കാട്ടിയാണ് റിബേഷ് കോടതിയെ സമീപിച്ചത്. എന്നാൽ മുൻകൂർ ജാമ്യം നൽകുന്നതിനെ പ്രോസിക്യൂഷൻ ശക്തമായി എതിർത്തിരുന്നു.
കാഫിർ പരാമർശമുള്ള സ്‌ക്രീൻഷോട്ട് ആദ്യം വാട്സ്ആപ്പ് ഗ്രൂപ്പിൽ പങ്കുവെച്ചത് റിബേഷാണെന്ന് കേസിലെ പ്രതിയായ എംഎസ്എഫ് നേതാവ് മുഹമ്മദ് കാസിം ആരോപിച്ചിരുന്നു. റിബേഷിനെയും മറ്റു ചിലരെയും സംരക്ഷിക്കാനാണ് പൊലീസ് ശ്രമിക്കുന്നതെന്നും കാസിം പറഞ്ഞിരുന്നു.
അതേസമയം, കേസിലെ മറ്റൊരു പ്രതിയായ ജിതിൻ ഭാസ്‌കറിന്റെ ജാമ്യം റദ്ദാക്കണമെന്ന പ്രത്യേക അന്വേഷണ സംഘത്തിന്റെ (എസ്‌ഐടി) ഹർജി വടകര ജുഡീഷ്യൽ മജിസ്‌ട്രേറ്റ് കോടതി തള്ളി.
ജാമ്യ വ്യവസ്ഥ ലംഘിച്ചെന്നാണ് എസ്‌ഐടി കോടതിയിൽ അറിയിച്ചത്. എന്നാൽ ജിതിൻ ഭാസ്‌കർ മുദ്രാവാക്യം വിളിച്ചത് മാത്രമാണെന്നും അദ്ദേഹത്തിനെതിരായ കേസ് കെട്ടിച്ചമച്ചതാണെന്നും പ്രതിഭാഗം വാദിച്ചു. ഈ വാദം അംഗീകരിച്ചാണ് കോടതി ജാമ്യം റദ്ദാക്കണമെന്ന ഹർജി തള്ളിയത്.
