മലപ്പുറം: കാണാതായ മലപ്പുറം ചേലേമ്പ്ര സ്വദേശി വ്ലോഗർ മുഹമ്മദ് ദിൽഷാദിനെ കണ്ടെത്തി. ബൈക്ക് അപകടത്തിൽപ്പെട്ട ദിൽഷാദ് നിലവിൽ മേഘാലയയിലെ ഒരു ആശുപത്രിയിൽ ചികിത്സയിലാണ്. ആരോഗ്യനില തൃപ്തികരമാണെന്നാണ് ലഭിക്കുന്ന വിവരം. വനമേഖലയോട് ചേർന്ന പ്രദേശത്ത് നിന്നാണ് ദിൽഷാദിനെ കണ്ടെത്തിയത്. ആരോഗ്യനില മെച്ചപ്പെട്ടാൽ ഉടൻ നാട്ടിലെത്തിക്കുമെന്ന് കുടുംബാംഗങ്ങൾ അറിയിച്ചു.

മലപ്പുറം ചേലേമ്പ്ര പുല്ലിപ്പറമ്പ് പാറയിൽ സ്വദേശിയായ ദിൽഷാദ് ‘യാത്ര ടുഡേ’ എന്ന യൂട്യൂബ് ചാനലിലൂടെയാണ് ശ്രദ്ധ നേടിയത്. വിവിധ രാജ്യങ്ങളിലേക്കുള്ള യാത്രകളുടെ വീഡിയോകൾ പങ്കുവെച്ച് നിരവധി ആരാധകരെ സ്വന്തമാക്കിയ വ്ലോഗറാണ് അദ്ദേഹം.

യാത്രയുടെ ഭാഗമായി കഴിഞ്ഞ ജൂൺ 6-നാണ് ദിൽഷാദ് വീട്ടിൽ നിന്ന് പുറപ്പെട്ടത്. തുടർന്ന് നാല് ദിവസമായി ബന്ധപ്പെടാൻ കഴിയാത്തതിനെ തുടർന്ന് കുടുംബം തേഞ്ഞിപ്പലം പൊലീസിൽ പരാതി നൽകിയിരുന്നു. പരാതിയുടെ അടിസ്ഥാനത്തിൽ പൊലീസ് അന്വേഷണം ആരംഭിച്ചതിന് പിന്നാലെയാണ് ദിൽഷാദിനെ കണ്ടെത്തിയത്.