ചെന്നൈ: സംഗീത സംവിധായകൻ എ.ആർ. റഹ്മാന്റെ മകനും ഗായകനുമായ എ.ആർ. അമീന് വാഹനാപകടത്തിൽ പരിക്ക്. ഞായറാഴ്ച വൈകുന്നേരം ചെന്നൈ ഗിണ്ടിയിലെ കാത്തിപ്പാറ ഫ്ലൈഓവറിന് സമീപമാണ് അപകടമുണ്ടായത്. കോയമ്പേട്ടിൽ നിന്ന് നഗരത്തിലേക്ക് സുഹൃത്തിനൊപ്പം യാത്ര ചെയ്യുന്നതിനിടെ അമീൻ സഞ്ചരിച്ചിരുന്ന പോർഷെ കാർ മറ്റൊരു വാഹനവുമായി കൂട്ടിയിടിക്കുകയായിരുന്നു.
സൈഡ് റോഡിൽ നിന്ന് പ്രധാന റോഡിലേക്ക് പ്രവേശിച്ച വാഗൺ ആർ കാറാണ് അമീൻ സഞ്ചരിച്ചിരുന്ന കാറുമായി കൂട്ടിയിടിച്ചതെന്ന് പൊലീസ് അറിയിച്ചു. അപകടത്തിൽ അമീനും സുഹൃത്തിനും ഗുരുതര പരിക്കുകളില്ല. ഇരുവരെയും അപകടത്തിന് പിന്നാലെ കാവേരി ആശുപത്രിയിൽ പ്രവേശിപ്പിച്ചു. പ്രാഥമിക ചികിത്സ നൽകിയ ശേഷം ഇരുവരെയും ആശുപത്രിയിൽ നിന്ന് ഡിസ്ചാർജ് ചെയ്തു.
വാഗൺ ആർ കാറിലുണ്ടായിരുന്ന പരിക്കേറ്റയാളെ കലൈഞ്ജർ സെന്റിനറി സൂപ്പർ സ്പെഷ്യാലിറ്റി ആശുപത്രിയിൽ പ്രവേശിപ്പിച്ചു. ചികിത്സയ്ക്ക് ശേഷം ഇയാളെയും ഡിസ്ചാർജ് ചെയ്തു. അപകടത്തിൽപ്പെട്ട രണ്ട് വാഹനങ്ങളും അടയാർ ട്രാഫിക് ഇൻവെസ്റ്റിഗേഷൻ വിംഗ് പൊലീസ് കസ്റ്റഡിയിലെടുത്തു. അപകടത്തിന്റെ കൃത്യമായ കാരണം കണ്ടെത്താൻ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.
പിന്നണി ഗാനരംഗത്ത് ശ്രദ്ധേയ സാന്നിധ്യം
2015ൽ മണിരത്നം സംവിധാനം ചെയ്ത ‘ഓ കാതൽ കൺമണി’ എന്ന ചിത്രത്തിലെ ‘മൗലാ സല്ലി വസല്ലിം’ എന്ന ഗാനത്തിലൂടെയാണ് എ.ആർ. അമീൻ പിന്നണി ഗാനരംഗത്തേക്ക് അരങ്ങേറ്റം കുറിച്ചത്. എ.ആർ. റഹ്മാന്റെ അന്താരാഷ്ട്ര സംഗീത പരിപാടികളിലും അമീൻ പാടാറുണ്ട്.
അടുത്തിടെ രാം ചരണിന്റെ ‘പെഡ്ഡി’യുടെ തമിഴ് പതിപ്പിലെ ‘ചികിരി ചികിരി’ എന്ന ഗാനം അമീൻ ആലപിച്ചിരുന്നു. ജസ്ലീൻ റോയലിനൊപ്പം പുറത്തിറക്കിയ ‘ഭീഗി ഭീഗി’ എന്ന സ്വതന്ത്ര ഗാനവും ശ്രദ്ധ നേടിയിരുന്നു. ഗാനത്തിന്റെ സംഗീത വീഡിയോയിൽ ദുൽഖർ സൽമാനും മൃണാൾ ഠാക്കൂറുമാണ് അഭിനയിച്ചത്.
അതേസമയം, എ.ആർ. റഹ്മാൻ നിരവധി പുതിയ ചിത്രങ്ങളുടെ സംഗീതസംവിധാനവുമായി തിരക്കിലാണ്. രണ്ട് ഭാഗങ്ങളായി ഒരുങ്ങുന്ന ‘രാമായണം: പാർട്ട് 1 & 2’, ‘ബട്വാര 1947’, ‘മൂൺ വാക്ക്’ എന്നിവയാണ് അദ്ദേഹത്തിന്റെ വരാനിരിക്കുന്ന പ്രധാന പ്രോജക്ടുകൾ. ധനുഷും മാരി സെൽവരാജും ഒന്നിക്കുന്ന പേരിട്ടിട്ടില്ലാത്ത ചിത്രത്തിലും റഹ്മാൻ സംഗീതം നൽകുന്നുണ്ട്.
