ഹോർമുസ്: ഹോർമുസ് കടലിടുക്കിലെ ഇറാന്റെ ലാറക് ദ്വീപിൽ അമേരിക്കൻ സൈന്യം ആക്രമണം നടത്തി. ദ്വീപിലെ രണ്ട് ലോഞ്ചറുകൾക്ക് നേരെയാണ് ഞായറാഴ്ച ആക്രമണമുണ്ടായത്. ജൂലൈ അവസാനത്തിന് ശേഷം ഇറാനിൽ അമേരിക്ക നടത്തുന്ന ആദ്യ ആക്രമണമാണിത്.

ആക്രമണത്തിന് പിന്നാലെ ജോർദാനിലെ രണ്ട് അമേരിക്കൻ വ്യോമതാവളങ്ങൾ ആക്രമിച്ചതായി ഇറാൻ അറിയിച്ചു. അമേരിക്കൻ ആക്രമണത്തിന് മറുപടിയായാണ് താവളങ്ങൾ ആക്രമിച്ചതെന്നാണ് ഇറാന്റെ വിശദീകരണം.

ആറുമാസമായി തുടരുന്ന യുഎസ്- ഇറാൻ സംഘർഷം കൂടുതൽ രൂക്ഷമായതോടെ രാജ്യാന്തര വിപണിയിൽ എണ്ണവില ഉയർന്നു. ബ്രെന്റ് ക്രൂഡ് വില 2.21 ഡോളർ ഉയർന്ന് ബാരലിന് 90.31 ഡോളറിലെത്തി. യുഎസ് വെസ്റ്റ് ടെക്സസ് ഇന്റർമീഡിയറ്റ് ക്രൂഡ് വില 1.83 ഡോളർ ഉയർന്ന് ബാരലിന് 85.23 ഡോളറിലാണ് വ്യാപാരം നടക്കുന്നത്. മിഡിൽ ഈസ്റ്റിലെ സംഘർഷം കൂടുതൽ രൂക്ഷമായാൽ എണ്ണവിതരണത്തെ ബാധിക്കുമെന്ന ആശങ്കയാണ് വില ഉയരാൻ പ്രധാന കാരണം.