പത്ത് പേരോട് സംസാരിച്ചാൽ അതിൽ 8 പേർക്കും പനിയോ ചുമയോ ജലദോഷമോ ആയിരിക്കും. ഇതാണ് ഇപ്പോഴത്തെ അവസ്ഥ. പനി, ജലദോഷം, ചുമ, തൊണ്ടവേദന തുടങ്ങിയ ശ്വാസകോശ സംബന്ധമായ അസുഖങ്ങൾ ഇപ്പോൾ കൂടുതലായി റിപ്പോർട്ട് ചെയ്യപ്പെടുന്നു. പ്രത്യേകിച്ച് മഴയും വെയിലും മാറിമാറി അനുഭവപ്പെടുന്ന സാഹചര്യത്തിൽ ശരീരത്തിന്റെ പ്രതിരോധ സംവിധാനത്തെയും ദൈനംദിന ആരോഗ്യശീലങ്ങളെയും കൂടുതൽ ശ്രദ്ധിക്കേണ്ടതുണ്ട്.
പനി സാധാരണയായി വൈറസ്, ബാക്ടീരിയ തുടങ്ങിയ രോഗാണുക്കൾ മൂലമാണ് ഉണ്ടാകുന്നത്. എന്നാൽ താപനിലയിലും ഈർപ്പത്തിലും ഉണ്ടാകുന്ന മാറ്റങ്ങൾ ചില ശ്വാസകോശ വൈറസുകളുടെ വ്യാപനത്തിന് കാരണമാകാം. മഴക്കാലത്തും കാലാവസ്ഥ മാറുന്ന സമയത്തും വീടുകളിലും ഓഫീസുകളിലും സ്കൂളുകളിലും ആളുകൾ അടുത്തടുത്തായി കഴിയുന്നത് രോഗാണുക്കൾ ഒരാളിൽ നിന്ന് മറ്റൊരാളിലേക്ക് പകരാനുള്ള സാധ്യത വർധിപ്പിക്കും. കൂടാതെ ഉറക്കക്കുറവ്, ഭക്ഷണക്രമത്തിലെ മാറ്റം, വെള്ളം കുടിയുടെ കുറവ് തുടങ്ങിയവയും ശരീരത്തിന്റെ പൊതുവായ ആരോഗ്യത്തെ ബാധിക്കാം.
മതിയായ വിശ്രമം എടുക്കുക എന്നതാണ് പനി വന്നാൽ ആദ്യം ചെയ്യേണ്ടത്. വെള്ളം, കഞ്ഞിവെള്ളം, സൂപ്പ്, കഞ്ഞി തുടങ്ങിയവ ആവശ്യത്തിന് കഴിക്കുക. എളുപ്പം ദഹിക്കുന്ന പോഷകസമൃദ്ധമായ ഭക്ഷണം കഴിക്കുക. ശരീരത്തിൽ ജലാംശം കുറയുന്നില്ലെന്ന് ഉറപ്പാക്കുക. പനി ഉള്ളപ്പോൾ മറ്റുള്ളവരുമായി അടുത്ത സമ്പർക്കം പരമാവധി കുറയ്ക്കുക. കൈകൾ ഇടയ്ക്കിടെ സോപ്പും വെള്ളവും ഉപയോഗിച്ച് കഴുകുക. ചുമയ്ക്കുമ്പോഴും തുമ്മുമ്പോഴും ടിഷ്യൂ അല്ലെങ്കിൽ കൈമുട്ടിന്റെ മടക്ക് ഉപയോഗിച്ച് വായും മൂക്കും മൂടുക.
സ്വയം ആന്റിബയോട്ടിക് കഴിക്കുന്ന ശീലം നല്ലതല്ല. പനി വന്നാൽ ഉടൻ ആന്റിബയോട്ടിക് കഴിക്കുന്ന ശീലം ഒഴിവാക്കണം. സാധാരണ ജലദോഷത്തിനും പല വൈറൽ അണുബാധകൾക്കും ആന്റിബയോട്ടിക്കുകൾ ഫലപ്രദമല്ല. ഡോക്ടറുടെ നിർദേശമില്ലാതെ ആന്റിബയോട്ടിക് ഉപയോഗിക്കുന്നത് മരുന്നുകളോടുള്ള പ്രതിരോധശേഷി (antimicrobial resistance) വർധിപ്പിക്കാനും പാർശ്വഫലങ്ങൾ ഉണ്ടാക്കാനും ഇടയാക്കാം. മറ്റൊരാൾക്ക് ഡോക്ടർ നിർദേശിച്ച മരുന്ന് നമ്മൾ കഴിക്കുന്നതും നല്ലതല്ല.
