തിരുവനന്തപുരം: മലപ്പുറം ജില്ലയിലെ ജനങ്ങളെ വർഗീയമായി അധിക്ഷേപിച്ചുള്ള സിപിഎം നേതാവ് പി. നന്ദകുമാറിന്റെ പ്രസംഗം കേരളത്തിന്റെ മതനിരപേക്ഷ നിലപാടിനോടുള്ള വെല്ലുവിളിയാണെന്ന് വി.ഡി. സതീശൻ .
മതമൗലികവാദികളുടെയും വർഗീയവാദികളുടെയും കൂടാരമാണ് മലപ്പുറം എന്നായിരുന്നു നന്ദകുമാറിന്റെ പരാമർശം. പിണറായി വിജയൻ ഉൾപ്പെടെയുള്ള നേതാക്കൾ പങ്കെടുത്ത യോഗത്തിലാണ് പരാമർശമുണ്ടായതെന്നും സതീശൻ പറഞ്ഞു. നന്ദകുമാറിന്റെ പരാമർശം പിണറായി വിജയനും സിപിഎമ്മും തള്ളിപ്പറയാത്തത് അവരുടെ നിലപാട് വ്യക്തമാക്കുന്നതാണെന്നും അദ്ദേഹം ആരോപിച്ചു.
മുൻപ് മുഖ്യമന്ത്രിയായിരുന്ന സമയത്ത് പിണറായി വിജയൻ മലപ്പുറം ജില്ലയെക്കുറിച്ച് നടത്തിയ പരാമർശങ്ങളുടെ തുടർച്ചയാണ് ഇപ്പോഴത്തേതെന്നും സതീശൻ ആരോപിച്ചു. ഒരു പ്രത്യേക മതവിഭാഗത്തെ ലക്ഷ്യമിട്ട് സിപിഎം നടത്തുന്ന രാഷ്ട്രീയ നിലപാടാണ് ഇതിലൂടെ വ്യക്തമാകുന്നതെന്നും അദ്ദേഹം പറഞ്ഞു.
തിരഞ്ഞെടുപ്പുകളിൽ ജനങ്ങൾ സിപിഎമ്മിന്റെ ഇത്തരം പ്രചാരണങ്ങൾക്ക് മറുപടി നൽകിയിട്ടും പാർട്ടി നിലപാട് തിരുത്താൻ തയ്യാറാകാത്തത് അപലപനീയമാണെന്നും സതീശൻ പറഞ്ഞു. വർഗീയതയുടെ കാര്യത്തിൽ സംഘപരിവാറും സിപിഎമ്മും ഒരുപോലെയാണെന്ന വിമർശനവും അദ്ദേഹം ഉന്നയിച്ചു.
നന്ദകുമാറിന്റെ പരാമർശത്തിൽ പിണറായി വിജയൻ നിലപാട് വ്യക്തമാക്കണമെന്നും സിപിഎം കേന്ദ്ര നേതൃത്വം ഇതേ നിലപാടിനൊപ്പമാണോ എന്ന് വ്യക്തമാക്കണമെന്നും സതീശൻ ആവശ്യപ്പെട്ടു. പരാമർശത്തിൽ കേരളത്തോട് സിപിഎമ്മും പി. നന്ദകുമാറും മാപ്പ് പറയണമെന്നും അദ്ദേഹം ആവശ്യപ്പെട്ടു. കേരളത്തിൽ ആരെങ്കിലും വർഗീയ പരാമർശങ്ങൾ നടത്തിയാൽ ശക്തമായ നടപടി സ്വീകരിക്കുമെന്നും വി.ഡി. സതീശൻ പറഞ്ഞു.
