തിരുവനന്തപുരം: തലസ്ഥാനത്ത് എസ്.എഫ്.ഐ പ്രവർത്തകർക്ക് നേരെയുണ്ടായ പൊലീസ് ലാത്തിച്ചാർജ് നിയമസഭയിൽ ഉന്നയിച്ച് പ്രതിപക്ഷം. ഒടിഞ്ഞ ലാത്തിയുടെ കഷ്ണവുമായാണ് വി. ജോയി സഭയിലെത്തിയത്. പൊലീസ് ഉദ്യോഗസ്ഥരെ നിയന്ത്രിക്കാൻ ആഭ്യന്തരമന്ത്രി തയ്യാറാകണമെന്ന് അദ്ദേഹം ആവശ്യപ്പെട്ടു. സംഭവത്തിൽ പൊലീസിനെ ന്യായീകരിച്ച ആഭ്യന്തരമന്ത്രി, സർവകലാശാലാ ഹോസ്റ്റലിൽനിന്ന് ബിയർ കുപ്പികൾ എറിഞ്ഞതാണ് സംഘർഷത്തിന് കാരണമായതെന്ന് മറുപടി നൽകി. തമിഴ്നാട്ടിൽനിന്ന് പൊലീസുകാരെ ഇറക്കിയിട്ടില്ലെന്നും കഴിഞ്ഞ പത്ത് വർഷം എൽ.ഡി.എഫ് ഭരിച്ച കാലത്തുണ്ടായിരുന്ന പൊലീസ് സേന തന്നെയാണ് ഇപ്പോഴുമുള്ളതെന്നും പ്രതിപക്ഷ നേതാവ് രമേശ് ചെന്നിത്തല തിരിച്ചടിച്ചു. പിന്നാലെ സഭയിൽ ബഹളമുയർന്നു. അടിയന്തര പ്രമേയത്തിന് അനുമതി നിഷേധിച്ചതോടെ പ്രതിപക്ഷം സഭയിൽനിന്ന് ഇറങ്ങിപ്പോയി.

ഗ്യാനേഷ് കുമാറിനും ബി.ജെ.പിക്കുമെതിരെ പ്രതിഷേധിച്ച യൂത്ത് കോൺഗ്രസ് പ്രവർത്തകർക്കുനേരെ സർവകലാശാലാ ഹോസ്റ്റലിൽനിന്ന് എസ്.എഫ്.ഐ പ്രവർത്തകർ ബിയർ കുപ്പികൾ എറിഞ്ഞതും കൂക്കിവിളിച്ചതും എന്തിനാണെന്ന് ആഭ്യന്തരമന്ത്രി രമേശ് ചെന്നിത്തല ചോദിച്ചു. കല്ലും പന്തങ്ങളും പരസ്പരം എറിഞ്ഞതിനെ തുടർന്നാണ് സംഘർഷമുണ്ടായതെന്നും പൊലീസ് ഉദ്യോഗസ്ഥർക്കും പരിക്കേറ്റെന്നും അദ്ദേഹം പറഞ്ഞു.

എന്നാൽ, പൊലീസ് വിദ്യാർഥികളെ മൃഗീയമായി മർദിച്ചെന്നാണ് വി. ജോയിയുടെ ആരോപണം. എസ്.എഫ്.ഐ സംസ്ഥാന പ്രസിഡന്റിനെ ഉൾപ്പെടെ ക്രൂരമായി മർദിച്ചെന്നും മാധ്യമപ്രവർത്തകർക്ക് പരിക്കേറ്റെന്നും ആംബുലൻസിനെപ്പോലും തടഞ്ഞെന്നും അദ്ദേഹം ആരോപിച്ചു. കന്റോൺമെന്റ് എസ്.ഐ ഗോകുലിനെതിരെയും ജോയി വിമർശനമുന്നയിച്ചു. 36 സെക്കൻഡിനുള്ളിൽ 24 തവണ വിദ്യാർഥികളുടെ തലയ്ക്ക് അടിച്ചുവെന്നും അദ്ദേഹം സഭയിൽ ആരോപിച്ചു. പൊലീസ് സേനയിൽ ക്രിമിനലുകളാണുള്ളതെന്ന ജോയിയുടെ പരാമർശത്തിന് പിന്നാലെ സഭയിൽ ബഹളമുയർന്നു. പൊലീസ് ഉദ്യോഗസ്ഥരെ നിയന്ത്രിക്കാൻ ആഭ്യന്തരമന്ത്രി തയ്യാറാകണമെന്നും അദ്ദേഹം ആവശ്യപ്പെട്ടു.

പൊലീസുകാരെ വധിക്കുമെന്ന് ഭീഷണിപ്പെടുത്തിയ വി. ജോയി തന്നെ അടിയന്തര പ്രമേയം അവതരിപ്പിച്ചതിൽ സന്തോഷമുണ്ടെന്നായിരുന്നു ആഭ്യന്തരമന്ത്രിയുടെ പരിഹാസം. പൊലീസ് സേനയിൽ അച്ചടക്കമില്ലായ്മ അനുവദിക്കില്ലെന്നും പരാതികൾ പരിശോധിച്ച് നടപടി സ്വീകരിക്കുമെന്നും അദ്ദേഹം വ്യക്തമാക്കി. അധികാരത്തിലെത്തി ഒരാഴ്ചയ്ക്കകം തന്നെ പ്രതിഷേധം തുടങ്ങിയെന്നും ഹണിമൂൺ കാലം പോലും അനുവദിച്ചില്ലെന്നും ചെന്നിത്തല പരിഹസിച്ചു.

അതേസമയം, ആഭ്യന്തരമന്ത്രി പതിവ് ശൈലിയിൽനിന്ന് വ്യത്യസ്തമായാണ് മറുപടി നൽകിയതെന്നും അതിൽ കുറ്റബോധം പ്രകടമായിരുന്നുവെന്നും പ്രതിപക്ഷ നേതാവ് പിണറായി വിജയൻ സഭയിൽ പറഞ്ഞു. അടിയന്തര പ്രമേയാവതരണത്തിന് അനുമതി നിഷേധിച്ചതോടെയാണ് പ്രതിപക്ഷം സഭ ബഹിഷ്കരിച്ചത്.