തിരുവനന്തപുരം: രമ്യ ഹരിദാസ് എംഎൽഎയ്ക്കുവേണ്ടി വഴിവിട്ട ഇടപെടലെന്ന ആരോപണം വീണ്ടും ഉയരുന്നു. മന്ത്രി ബിന്ദു കൃഷ്ണയുടെ പേഴ്‌സണൽ സ്റ്റാഫിൽ ഓഫീസ് അറ്റൻഡന്റായി നിയമിച്ച സുരേഷ് കുമാർ രമ്യ ഹരിദാസിന്റെ ഡ്രൈവറായി ജോലി ചെയ്യുന്നതായാണ് റിപ്പോർട്ട്.
ഈ വർഷം ഓഗസ്റ്റ് 18നാണ് സുരേഷ് കുമാറിനെ ബിന്ദു കൃഷ്ണയുടെ പേഴ്‌സണൽ സ്റ്റാഫിൽ നിയമിച്ചത്. എംഎൽഎമാർക്ക് പേഴ്‌സണൽ അസിസ്റ്റന്റിനെയും ഡ്രൈവറെയും നിയമിക്കുന്നതിനായി സർക്കാർ പ്രത്യേക തസ്തികകൾ സൃഷ്ടിച്ചിട്ടുണ്ട്. എന്നാൽ, ഈ തസ്തികകളിലെ ശമ്പളം താരതമ്യേന കുറവായതിനാലാണോ സുരേഷ് കുമാറിനെ മന്ത്രിയുടെ ഓഫീസിൽ നിയമിച്ചതെന്ന ചോദ്യവും ഉയരുന്നുണ്ട്.
രമ്യ ഹരിദാസിന്റെ മുൻ പേഴ്‌സണൽ സ്റ്റാഫംഗം പാളയം പ്രദീപിന്റെ വിശ്വസ്തനാണ് സുരേഷ് കുമാറെന്നാണ് റിപ്പോർട്ട്. ദീർഘകാലമായി പ്രദീപുമായി അടുത്ത ബന്ധം പുലർത്തിയിരുന്ന സുരേഷ് കുമാർ, ഈ ബന്ധത്തിന്റെ ഭാഗമായാണോ മന്ത്രിയുടെ ഓഫീസിൽ നിയമനം നേടിയതെന്ന സംശയവും ഉയരുന്നുണ്ട്. നിയമനത്തിൽ ചട്ടലംഘനം നടന്നിട്ടുണ്ടോയെന്ന കാര്യത്തിലും ചർച്ചകൾ സജീവമാണ്.
നേരത്തെ ചിറയിൻകീഴിൽ രമ്യ ഹരിദാസ് ഉൾപ്പെട്ട കയ്യാങ്കളി സംഭവം കോൺഗ്രസിന് വലിയ തലവേദന സൃഷ്ടിച്ചിരുന്നു. പ്രദേശത്തും എംഎൽഎയ്‌ക്കെതിരെ എതിർപ്പുകൾ ഉയരുന്നതിനിടെയാണ് പുതിയ ആരോപണം പുറത്തുവരുന്നത്.
രമ്യ ഹരിദാസിന്റെ വാഹനം ഓടിക്കുന്ന ദൃശ്യങ്ങൾ സുരേഷ് കുമാർ തന്നെ ഫേസ്ബുക്കിൽ പങ്കുവച്ച റീലുകളിലൂടെയും പുറത്തുവന്നിരുന്നു. തിരഞ്ഞെടുപ്പ് കാലത്തും സുരേഷ് കുമാർ രമ്യ ഹരിദാസിനൊപ്പം സജീവമായിരുന്നു. സാധാരണയായി മന്ത്രിയുടെ പേഴ്‌സണൽ സ്റ്റാഫ് അംഗങ്ങൾ പ്രവൃത്തി ദിവസങ്ങളിൽ ഓഫീസിലെത്തുകയും മറ്റ് ഔദ്യോഗിക പരിപാടികളിൽ പങ്കെടുക്കുകയും വേണം. ഇതിനായി മന്ത്രിയുടെ ഓഫീസിൽനിന്ന് നിർദേശങ്ങളും ലഭിക്കണം. എന്നാൽ, ഇത്തരം നടപടിക്രമങ്ങൾ പാലിക്കാതെയാണ് സുരേഷ് കുമാർ രമ്യ ഹരിദാസിനുവേണ്ടി പ്രവർത്തിക്കുന്നതെന്നാണ് റിപ്പോർട്ട്.
