തിരുവനന്തപുരം: പിഎസ്സി ചെയർമാനെതിരായ ഗവർണറുടെ നടപടിയിൽ പ്രതികരണവുമായി മന്ത്രി കെ. മുരളീധരൻ. പിഎസ്‌സിയിൽ ക്രമക്കേടുകൾ വ്യക്തമായതുകൊണ്ടാണ് സംസ്ഥാന സർക്കാർ അന്വേഷണം നടത്താൻ തീരുമാനിച്ചതെന്ന് അദ്ദേഹം പറഞ്ഞു.
എന്നാൽ, സർക്കാർ അന്വേഷണത്തോട് സഹകരിക്കാത്ത നിലപാടാണ് പിഎസ്സി സ്വീകരിച്ചതെന്നും ഇതാകാം ഗവർണറുടെ നടപടിക്ക് കാരണമെന്നും മന്ത്രി വ്യക്തമാക്കി. പിഎസ്സി സ്വതന്ത്ര സ്ഥാപനമാണെങ്കിലും അതിന്റെ ലക്ഷ്യങ്ങളിൽനിന്ന് വ്യതിചലിച്ചുവെന്ന് മുരളീധരൻ ആരോപിച്ചു. സ്ഥാപനത്തിലെ പ്രശ്നങ്ങൾ പരിഹരിക്കാനാണ് സർക്കാർ ഇടപെട്ടതെന്നും അദ്ദേഹം പറഞ്ഞു.
പിഎസ്സി അഴിമതി നിറഞ്ഞ സ്ഥാപനമായി മാറിയെന്നും കേരളത്തിന്റെ ചരിത്രത്തിൽ ഇത്രയും മോശമായ കാലഘട്ടം മുമ്പുണ്ടായിട്ടില്ലെന്നും മന്ത്രി വിമർശിച്ചു. പിഎസ്‌സിയുടെ നിലവിലെ സാഹചര്യം മാറേണ്ടതുണ്ടെന്നും അദ്ദേഹം കൂട്ടിച്ചേർത്തു. പിഎസ്സി അംഗങ്ങളുടെ നിയമനവുമായി ബന്ധപ്പെട്ട കാര്യങ്ങൾ സർക്കാർ ഇനി പരിശോധിച്ച് തീരുമാനിക്കേണ്ടതാണെന്നും മുരളീധരൻ പറഞ്ഞു.
