തിരുവനന്തപുരം: സംസ്ഥാന സ്കൂൾ കായികമേളയിലെ ഭക്ഷണത്തിൽ പുഴുവിനെ കണ്ടെത്തിയ സംഭവത്തിൽ അധ്യാപകൻ ജിജോ ജെയിംസ് പുഴുവിനെ ഭക്ഷണത്തിൽ കൊണ്ടിട്ടതായി തെളിയിക്കുന്ന ദൃശ്യങ്ങൾ കണ്ടെത്താനായില്ലെന്ന് പൊലീസ്. സി.സി.ടി.വി ദൃശ്യങ്ങൾ പൂർണമായും പരിശോധിച്ചെങ്കിലും അധ്യാപകൻ ഭക്ഷണത്തിൽ പുഴുവിനെ നിക്ഷേപിക്കുന്ന ദൃശ്യങ്ങൾ ലഭിച്ചിട്ടില്ലെന്നാണ് പൊലീസിന്റെ വിശദീകരണം. പുഴുവിന്റെ ദൃശ്യങ്ങൾ പ്രചരിപ്പിച്ചുവെന്ന വകുപ്പ് മാത്രം ഉൾപ്പെടുത്തി കോടതിയിൽ റിപ്പോർട്ട് സമർപ്പിക്കാനാണ് പൊലീസിന്റെ നീക്കം.
സി.സി.ടി.വി ദൃശ്യങ്ങൾ പരിശോധിച്ചതിൽ ഭക്ഷണം വാങ്ങുന്നതു മുതൽ അധ്യാപകൻ മൊബൈൽ ഫോണിൽ ദൃശ്യങ്ങൾ പകർത്തിയിരുന്നതായി കണ്ടെത്തിയിട്ടുണ്ട്. എന്നാൽ ഭക്ഷണത്തിൽ പുഴു എങ്ങനെ എത്തിയെന്ന കാര്യം സ്ഥിരീകരിക്കാൻ പൊലീസിന് ഇതുവരെ കഴിഞ്ഞിട്ടില്ല.
അതേസമയം, കായികമേളയിലെ പ്രശ്നം സമൂഹമാധ്യമങ്ങളിലൂടെ പ്രചരിപ്പിക്കാൻ ശ്രമിച്ചത് ഗുരുതര കുറ്റകൃത്യമാണെന്ന് കോടതിയെ അറിയിക്കാനാണ് പൊലീസിന്റെ നീക്കം. അധ്യാപകൻ പുഴുവിനെ കൊണ്ടുവന്ന് ഭക്ഷണത്തിൽ നിക്ഷേപിക്കുന്നത് കണ്ടവരുണ്ടെന്ന് മന്ത്രി എൻ. ഷംസുദ്ദീൻ ഉൾപ്പെടെയുള്ളവർ നേരത്തെ ആരോപിച്ചിരുന്നു. എന്നാൽ സി.സി.ടി.വി ദൃശ്യങ്ങളിൽ ഇതിന് തെളിവുകൾ ലഭിക്കാത്തത് ആരോപണങ്ങളെ ദുർബലപ്പെടുത്തുന്നതാണ്.
അധ്യാപകൻ ജിജോ ജെയിംസിന്റെ രാഷ്ട്രീയ പശ്ചാത്തലവും നേരത്തെ വലിയ വിവാദമായിരുന്നു. മുൻപ് കോൺഗ്രസ് പ്രവർത്തകനായിരുന്ന ജിജോ തദ്ദേശ തെരഞ്ഞെടുപ്പിൽ മത്സരിച്ചിരുന്നു. പിന്നീട് ഡി.വൈ.എഫ്.ഐയിലേക്ക് മാറിയെന്ന തരത്തിലുള്ള ആരോപണങ്ങളും ചർച്ചയായിരുന്നു.
വിവാദം തന്റെ കുട്ടികളുടെ പ്രകടനത്തെ ബാധിച്ചെന്നും താൻ നിരപരാധിയാണെന്ന് തെളിയിക്കുമെന്നും അധ്യാപകൻ ജിജോ ജെയിംസ് നേരത്തെ പ്രതികരിച്ചിരുന്നു. തനിക്കുമേൽ കുറ്റം അടിച്ചേൽപ്പിച്ചതാണെന്നും അദ്ദേഹം ആരോപിച്ചിരുന്നു. കേസിൽ റിമാൻഡിലായിരുന്ന അധ്യാപകൻ നിലവിൽ ജാമ്യത്തിലാണ്.
