എറണാകുളം: ആലുവയിൽ നടന്ന ഹാലോവീൻ പാർട്ടി സംഘടിപ്പിച്ചവരിൽ ഒരാളായ 24കാരിയെ ചോദ്യം ചെയ്യാനൊരുങ്ങി പൊലീസ്. എറണാകുളം സ്വദേശിനിയായ യുവതി കേസിൽ അറസ്റ്റിലായ പ്രധാന പ്രതി അലക്സിന്റെ അടുത്ത സുഹൃത്താണ്. പാർട്ടിയുടെ പ്രധാന സംഘാടകർക്കിടയിൽ യുവതിയും ഉണ്ടായിരുന്നുവെന്നാണ് വിവരം. പോക്സോ കേസിൽ അറസ്റ്റിലായ അലക്സിനെ കസ്റ്റഡിയിൽ വാങ്ങുന്നതിനായി പൊലീസ് ഇന്ന് അപേക്ഷ നൽകും.

ഹാലോവീൻ പാർട്ടിയിൽ പങ്കെടുത്ത പ്രായപൂർത്തിയാകാത്ത പെൺകുട്ടി ലൈംഗികാതിക്രമത്തിന് ഇരയായ സംഭവത്തിൽ അന്വേഷണം വ്യാപിപ്പിച്ചിരിക്കുകയാണ് പൊലീസ്. പാർട്ടിയിൽ മദ്യം വിളമ്പിയിരുന്നുവെന്ന് ഇതിനോടകം വ്യക്തമായിട്ടുണ്ട്. ഇതിന് പുറമെ മറ്റ് ലഹരിവസ്തുക്കളും ഉപയോഗിച്ചിരുന്നോയെന്നും പൊലീസ് പരിശോധിക്കുന്നുണ്ട്.

പാർട്ടിയിൽ പങ്കെടുത്ത എല്ലാവരെയും ചോദ്യം ചെയ്യാനാണ് അന്വേഷണ സംഘത്തിന്റെ തീരുമാനം. ഇതിന്റെ ആദ്യഘട്ടമായാണ് പ്രതിയുടെ സുഹൃത്തായ യുവതിയോട് ചോദ്യം ചെയ്യലിന് ഹാജരാകാൻ നിർദേശിച്ചിരിക്കുന്നത്. പാർട്ടി സംഘടിപ്പിക്കുന്നതിൽ യുവതിക്ക് പ്രധാന പങ്കുണ്ടായിരുന്നുവെന്നാണ് പൊലീസിന്റെ കണ്ടെത്തൽ.

അതേസമയം, അലക്സിനെ കസ്റ്റഡിയിൽ വാങ്ങി വിശദമായി ചോദ്യം ചെയ്യാനുള്ള നീക്കത്തിലാണ് പൊലീസ്. പൊലീസിനെ അറിയിക്കാതെയാണ് സംഘം റിസോർട്ടിൽ പാർട്ടി സംഘടിപ്പിച്ചത്. ഇതുമായി ബന്ധപ്പെട്ട് റിസോർട്ട് അധികൃതരെയും ജീവനക്കാരെയും പൊലീസ് നേരത്തെ ചോദ്യം ചെയ്തിരുന്നു. സംഭവത്തിൽ പൊലീസിന് പുറമെ എക്സൈസ് വകുപ്പും അന്വേഷണം ആരംഭിച്ചിട്ടുണ്ട്.