കണ്ണൂർ: പരിയാരം മെഡിക്കൽ കോളേജിൽ ചികിത്സയ്ക്കെത്തിച്ച രണ്ടര മാസം പ്രായമുള്ള കുഞ്ഞിന് ശസ്ത്രക്രിയ നടത്തിയതിൽ ഗുരുതര വീഴ്ചയുണ്ടായെന്ന് പരാതി. ആമാശയത്തിൽനിന്ന് കുടലിലേക്ക് ഭക്ഷണം കടന്നുപോകുന്ന ഭാഗത്തെ പൈലോറസ് പേശിയിലെ തടിപ്പ് നീക്കം ചെയ്യുന്നതിൽ അശ്രദ്ധയുണ്ടായെന്നാണ് ആരോപണം. ആദ്യ ശസ്ത്രക്രിയ പൂർണമാകാത്തതിനെ തുടർന്ന് പത്ത് ദിവസത്തിനുള്ളിൽ കുഞ്ഞിന് രണ്ടാമതും ശസ്ത്രക്രിയ നടത്തേണ്ടിവന്നു. കുഞ്ഞിന്റെ ആരോഗ്യനില വഷളായതോടെ മംഗലാപുരത്തെ സ്വകാര്യ ആശുപത്രിയിൽ അടിയന്തര ശസ്ത്രക്രിയ നടത്തിയാണ് ജീവൻ രക്ഷിച്ചത്.
കഴിഞ്ഞ ഒക്ടോബർ പത്തിനാണ് പാൽ കുടിച്ച ഉടൻ തുടർച്ചയായി ഛർദിക്കുന്നതിനെ തുടർന്ന് കുഞ്ഞിനെ പരിയാരം മെഡിക്കൽ കോളേജിൽ പ്രവേശിപ്പിച്ചത്. പയ്യന്നൂരിലെ സ്വകാര്യ ആശുപത്രിയിൽ ചികിത്സ തേടിയ ശേഷമാണ് കുഞ്ഞിനെ മെഡിക്കൽ കോളേജിലേക്ക് മാറ്റിയത്. പരിശോധനയിൽ ആമാശയത്തിൽനിന്ന് കുടലിലേക്ക് ഭക്ഷണം കടന്നുപോകുന്ന ഭാഗത്ത് തടിപ്പ് കണ്ടെത്തി. ഇതാണ് ഛർദിക്ക് കാരണമെന്ന് തിരിച്ചറിഞ്ഞതോടെ ഉടൻ ശസ്ത്രക്രിയ നടത്തി.
എന്നാൽ ശസ്ത്രക്രിയയ്ക്കുശേഷം ഡിസ്ചാർജ് ചെയ്ത് വീട്ടിലെത്തിച്ചപ്പോൾ കുഞ്ഞിന്റെ ഛർദി വർധിച്ചു. പിന്നീട് രക്തം ഛർദിക്കാൻ തുടങ്ങിയതോടെ ബന്ധുക്കൾ അടിയന്തരമായി ആംബുലൻസ് വിളിച്ച് കുഞ്ഞിനെ മംഗലാപുരത്തെ സ്വകാര്യ ആശുപത്രിയിലെത്തിച്ചു. അവിടെ നടത്തിയ പരിശോധനയിലാണ് പരിയാരം മെഡിക്കൽ കോളേജിൽ നടത്തിയ ശസ്ത്രക്രിയ പൂർണമായിരുന്നില്ലെന്ന് വ്യക്തമായതെന്നാണ് ബന്ധുക്കളുടെ ആരോപണം. തടിപ്പിന്റെ ചെറിയൊരു ഭാഗം മാത്രമാണ് നീക്കം ചെയ്തിരുന്നതെന്നും പരാതിയിൽ പറയുന്നു. തുടർന്ന് മംഗലാപുരത്തെ ആശുപത്രിയിൽ വീണ്ടും ശസ്ത്രക്രിയ നടത്തി. ഇതോടെ കുഞ്ഞിന്റെ ആരോഗ്യനില മെച്ചപ്പെട്ടു.
ചികിത്സയിൽ വീഴ്ചയുണ്ടായെന്നാരോപിച്ച് ബന്ധുക്കൾ മെഡിക്കൽ കോളേജ് അധികൃതർക്കും ആരോഗ്യ മന്ത്രിക്കും പൊലീസിലും പരാതി നൽകി. സംഭവത്തിൽ അന്വേഷണം നടത്താൻ മെഡിക്കൽ കോളേജ് അധികൃതർ അടിയന്തരമായി അന്വേഷണ ബോർഡ് രൂപീകരിച്ചിട്ടുണ്ട്. അന്വേഷണം ആരംഭിച്ചതായും അധികൃതർ അറിയിച്ചു.
