കണ്ണൂര് : യാത്രയയപ്പ് ചടങ്ങിൽ ജില്ലാ പഞ്ചായത്ത് പ്രസിഡന്റ് പി.പി ദിവ്യ ഗുരുതര ആരോപണം ഉന്നയിച്ചതിന് പിന്നാലെ കണ്ണൂർ എ.ഡി.എം നവീൻ ബാബു ആത്മഹത്യ ചെയ്ത സംഭവത്തിൽ പി.പി ദിവ്യയെ തള്ളാതെ സി.പി.എം ജില്ലാ സെക്രട്ടേറിയറ്റ്. ദിവ്യ യാത്രയയപ്പ് യോഗത്തില് പറഞ്ഞ കാര്യങ്ങള് അഴിമതിക്കെതിരായ സദുദ്ദേശപരമായ വിമര്ശനം മാത്രമാണെന്ന് സെക്രട്ടേറിയറ്റ് പുറത്തിറക്കിയ പ്രസ്താവനയിൽ പറയുന്നു.
തെറ്റായ പ്രവണതകള് അനുഭവത്തില് ഉണ്ടായാല് പലരും ജനപ്രതിനിധികളോട് അവരുടെ സങ്കടങ്ങള് വിവരിക്കാറുണ്ട്. അത്തരം ജനങ്ങളുടെ സങ്കടങ്ങള് കേട്ടുകൊണ്ടുള്ള പ്രതികരണമാണെങ്കിലും യാത്രയയപ്പ് യോഗത്തില് ഇത്തരം പരാമര്ശങ്ങള് ഒഴിവാക്കേണ്ടതായിരുന്നെന്നും പ്രസ്താവനയില് പറയുന്നുണ്ട്. ഉയര്ന്നു വന്ന പരാതികളെക്കുറിച്ചെല്ലാം സമഗ്ര അന്വേഷണം നടത്തണമെന്ന് പ്രസ്താവനയിൽ സര്ക്കാറിനോട് അഭ്യർഥിക്കുകയും ചെയ്തിട്ടുണ്ട്.
പ്രസ്താവനയുടെ പൂർണരൂപം:
കണ്ണൂര് എ.ഡി.എം ആയിരുന്ന കെ. നവീന് ബാബുവിന്റെ വേര്പാടില് സി.പി.എം ദുഖവും അനുശോചനവും രേഖപ്പെടുത്തുന്നു. ദുഖമനുഭവിക്കുന്ന കുടുംബത്തോടൊപ്പം സി.പി.എം പങ്കുചേരുന്നു. തികച്ചും ദൗര്ഭാഗ്യകരവും അപ്രതീക്ഷിതവുമായ മരണമാണിത്. ജില്ലാ പഞ്ചായത്ത് പ്രസിഡന്റ് യാത്രയയപ്പ് യോഗത്തില് പറഞ്ഞ കാര്യങ്ങള് അഴിമതിക്കെതിരായ സദുദ്ദേശപരമായ വിമര്ശനം മാത്രമാണ്.
തെറ്റായ പ്രവണതകള് അനുഭവത്തില് ഉണ്ടായാല് പലരും ജനപ്രതിനിധികളോട് അവരുടെ സങ്കടങ്ങള് വിവരിക്കാറുണ്ട്. അത്തരം ജനങ്ങളുടെ സങ്കടങ്ങള് കേട്ടുകൊണ്ടുള്ള പ്രതികരണമാണെങ്കിലും യാത്രയയപ്പ് യോഗത്തില് ഇത്തരം പരാമര്ശങ്ങള് ജില്ലാ പഞ്ചായത്ത് പ്രസിഡന്റ് ഒഴിവാക്കേണ്ടതായിരുന്നു. ഉയര്ന്നു വന്ന പരാതികളെക്കുറിച്ചെല്ലാം സര്ക്കാര് സമഗ്രമായ അന്വേഷണം നടത്തണമെന്ന് അഭ്യര്ത്ഥിക്കുന്നു.
