പാലക്കാട്: പാലക്കാട് നിന്നുള്ള യൂത്ത് കോണ്ഗ്രസ് മുന് സംസ്ഥാന സെക്രട്ടറി എ.കെ.ഷാനിബ് പാര്ട്ടി വിട്ടു. താന് സിപിഎമ്മിനൊപ്പം ചേര്ന്ന് പ്രവര്ത്തിക്കുമെന്നും പി.സരിന്റെ വിജയത്തിനായി ഇനി നിലകൊള്ളുമെന്നും ഷാനിബ് വാര്ത്താ സമ്മേളനത്തില് പറഞ്ഞു. മുഖ്യമന്ത്രി സ്ഥാനത്തിനായി വി.ഡി.സതീശന് ആര്.എസ്.എസിന്റെ കാല് പിടിക്കുകയാണെന്ന് പറഞ്ഞ ഷാനിബ് വാര്ത്താസമ്മേളനത്തിനിടെ വിതുമ്പി. വ്യക്തിപരമായ നേട്ടത്തിനല്ല പാര്ട്ടി വിടുന്നതെന്നും അദ്ദേഹം തുറന്നടിച്ചു.
സി.പി.എം തുടര് ഭരണം നേടിയിട്ടും കോണ്ഗ്രസ് തിരുത്താന് തയാറാവുന്നില്ല. പാലക്കാട് – വടകര- ആറന്മുള കരാര് കോണ്ഗ്രസും ആര്എസ്എസും തമ്മിലുണ്ടെന്നും ഈ കരാറിന്റെ രക്തസാക്ഷിയാണ് കെ മുരളീധരന് എന്നും ഷാനിബ് പറഞ്ഞു. പാലക്കാട് ഒരു സമുദായത്തില്പെട്ട നേതാക്കളെ കോണ്ഗ്രസ് പൂര്ണമായും തഴയുകയാണെന്ന് ഷാനിബ് വിമര്ശിച്ചു. ആ സമുദായത്തില് നിന്ന് താന് മാത്രം മതി നേതാവെന്നാണ് ഷാഫി പറമ്പിലിന്റെ നിലപാട്.
ഷാഫി പറമ്പിലിനു വേണ്ടി യൂത്ത് കോണ്ഗ്രസ് തെരെഞ്ഞടുപ്പ് രീതി തന്നെ മാറ്റി. എതിര് നിലപാട് പറഞ്ഞാല് ഫാന്സ് അസോസിയേഷന്കാരെക്കൊണ്ട് അപമാനിക്കും. ഉമ്മന് ചാണ്ടി അസുഖബാധിതനായതോടെയാണ് ഷാഫി പറമ്പില് കൂടുതല് തലപൊക്കിയത്.
ഉമ്മന്ചാണ്ടി സാറ് പോയ ശേഷം പാര്ട്ടിയില് പരാതി പറയാന് ആളില്ലാത്ത സ്ഥിതിയാണ്. പരാതി പറഞ്ഞാല് അത് കേള്ക്കാന് ആളില്ലാത്ത അവസ്ഥയാണ്. രാഷ്ട്രീയ വഞ്ചനയുടെ കഥയാണ് ഈ പാര്ട്ടിയില് നടക്കുന്നതെന്നും നിവൃത്തിക്കേട് കൊണ്ടാണ് പലരും പാര്ട്ടിയില് മിണ്ടാതെ നില്ക്കുന്നതാണെന്നും അദ്ദേഹം പറഞ്ഞു.
