പാലക്കാട്: പനയമ്പാടത്ത് അപകടത്തില് മരിച്ച വിദ്യാര്ത്ഥികളുടെയും മൃതദേഹം വീടുകളിലെത്തിച്ചു. പാലക്കാട് ജില്ലാ ജനറല് ആശുപത്രി മോര്ച്ചറിയില് സൂക്ഷിച്ചിരിക്കുന്ന മൃതദേഹങ്ങള് വിദ്യാര്ത്ഥികളുടെ വീട്ടിലേയ്ക്ക് എത്തിച്ചു.
പൊതുദര്ശനത്തിന് ശേഷം രാവിലെ പതിനൊന്ന് മണിയോടെ നാല് പേരുടെയും മൃതദേഹം തുപ്പനാട് ജുമാമസ്ജിദില് ഒരുമിച്ച് ഖബറടക്കും. നിദ ഫാത്തിമ, റിദ ഫാത്തിമ, ഇര്ഫാന ഷെറിന്, എ എസ് ആയിഷ എന്നിവര് പഠിച്ചിരുന്ന കരിമ്പ ഹയര്സെക്കന്ഡറി സ്കൂളിന് ഇന്ന് അവധി പ്രഖ്യാപിച്ചിട്ടുണ്ട്.
ഇന്നലെ വൈകുന്നേരമാണ് പരീക്ഷ കഴിഞ്ഞ് വീട്ടിലേയ്ക്ക് മടങ്ങുന്നതിനിടെ നാല് വിദ്യാര്ത്ഥിനികളും അതിദാരുണമായി അപകടത്തില്പ്പെട്ടത്. വ്യാഴാഴ്ച വൈകുന്നേരം സ്കൂള് വിട്ടുവരുന്ന വഴി സിമന്റ് ലോഡ് വഹിച്ച ലോറി വിദ്യാര്ത്ഥികളുടെ മുകളിലേക്ക് മറിയുകയായിരുന്നു. മറ്റൊരു വണ്ടിയില് ഇടിച്ച് നിയന്ത്രണം വിട്ട ലോറി പോസ്റ്റിലിടിച്ചാണ് കുട്ടികളുടെ മുകളിലേക്ക് മറിഞ്ഞത്.
