കൊച്ചി: താരസംഘടനയായ ‘അമ്മ’യിൽ നിലനിൽക്കുന്ന വിവാദങ്ങൾക്ക് പിന്നാലെ സംഘടനയിൽ നിന്ന് കൂടുതൽ രാജികൾ. നടന്മാരായ ജയൻ ചേർത്തല, കൈലാഷ്, ജോയ് മാത്യു എന്നിവർ ഔദ്യോഗികമായി രാജിവെച്ചു. ഇവർ ഇ-മെയിൽ മുഖേന സംഘടനയ്ക്ക് രാജിസന്ദേശം അയച്ചതായാണ് വിവരം.
ഇതിനിടെ ഭരണസമിതിയിൽ ഉണ്ടായിരുന്ന ചില അംഗങ്ങൾ നേരത്തെ രാജി പ്രഖ്യാപിച്ചിരുന്നു. സംഘടനയിൽ തുടരില്ലെന്ന നിലപാടിലാണ് ഇവർ രാജിവെച്ചതെന്ന് സൂചനകളുണ്ട്.
അതേസമയം, ‘അമ്മ’ പ്രസിഡന്റ് ശ്വേതാ മേനോൻ രാജി സമർപ്പിക്കില്ലെന്ന് വ്യക്തമാക്കിയിട്ടുണ്ട്. ഫേസ്ബുക്കിൽ പങ്കുവെച്ച കുറിപ്പിലൂടെ, താൻ നിരപരാധിത്വം തെളിയിക്കാതെ പടിയിറങ്ങില്ലെന്ന് അവർ പറഞ്ഞു. സംഘടനയെ അനാഥമാക്കി എന്ന തരത്തിലുള്ള വിമർശനങ്ങൾക്കും അവർ മറുപടി നൽകിയിരുന്നു.
കമ്മിറ്റി രാജി ആവശ്യപ്പെട്ടുള്ള അജണ്ടയുമായി ചിലർ ജനറൽ ബോഡി യോഗത്തിന് എത്തിയതായും, നിലവിലെ ഭരണസമിതിക്ക് തുടർന്നും പ്രവർത്തിക്കാനുള്ള നിയമപരമായ അവകാശമുണ്ടെന്നും ശ്വേതാ മേനോൻ ഫേസ്ബുക്കിൽ വ്യക്തമാക്കി. മുൻ കമ്മിറ്റികൾ രാജിവെച്ചപ്പോൾ സ്വീകരിച്ച നിലപാടുകൾ ഇപ്പോൾ തങ്ങളുടെ കാര്യത്തിൽ വ്യത്യസ്തമായി കാണുന്നതിനെക്കുറിച്ചും അവർ ചോദ്യം ഉയർത്തി.
സംഘടനയിൽ സാമ്പത്തിക ക്രമക്കേടുകൾ ഉൾപ്പെടെ ഉയർന്ന ആരോപണങ്ങൾക്കിടയിലാണ് ആഭ്യന്തര തർക്കങ്ങൾ ശക്തമായത്. ഇതിന് പിന്നാലെയാണ് ഭരണസമിതിയിൽ അസ്വസ്ഥതകൾ വർധിച്ചതും രാജികൾ ഉണ്ടായതുമെന്നാണ് റിപ്പോർട്ട്.
അഡ്‌ഹോക്ക് കമ്മിറ്റിയുടെ നിയമസാധുത ഉൾപ്പെടെയുള്ള വിഷയങ്ങളും സംഘടനയിൽ ചർച്ചയായിട്ടുണ്ട്. നിലവിലെ സാഹചര്യത്തിൽ ‘അമ്മ’യുടെ പ്രവർത്തനങ്ങൾ സംബന്ധിച്ച ആശയക്കുഴപ്പം തുടരുകയാണ്.
