കൊച്ചി: നടൻ ടിനി ടോമിനെതിരായ പരാതിയിൽ നടി അൻസിബയുമായി നടത്തിയ അനുരഞ്ജന നീക്കം പരാജയപ്പെട്ടു. മാപ്പ് എഴുതി നൽകണമെന്ന ടിനി ടോമിന്റെ ആവശ്യം അൻസിബ തള്ളി. വിഷയം കോടതിക്ക് പുറത്ത് തീർക്കണമെന്നും പരാതി പിൻവലിക്കണമെന്നും ആവശ്യപ്പെട്ട അഡ്ഹോക്ക് കമ്മിറ്റി കൺവീനർ കൂടിയായ എംഎൽഎ രമേശ് പിഷാരടിയുടെ ശ്രമവും ഫലം കണ്ടില്ല. ടിനി ടോം പരസ്യമായി മാപ്പ് പറഞ്ഞാൽ മാത്രമേ പരാതി പിൻവലിക്കൂവെന്ന് അൻസിബ വ്യക്തമാക്കി.
അതേസമയം, രാജിവെച്ച മുതിർന്ന താരങ്ങളെ തിരിച്ചുകൊണ്ടുവരാനുള്ള ശ്രമങ്ങളും സംഘടനയിൽ തുടരുന്നു. ശ്വേത മേനോൻ, മല്ലിക സുകുമാരൻ എന്നിവരെ വീണ്ടും സംഘടനയിലേക്ക് എത്തിക്കാനാണ് നീക്കം.
‘അമ്മ’ സംഘടനയുടെ അഡ്ഹോക്ക് കമ്മിറ്റിയുടെ യോഗം ഇന്നലെ ചേർന്നിരുന്നു. സംഘടനയ്ക്ക് ഉടൻ സ്ഥിരം കമ്മിറ്റി രൂപീകരിക്കുമെന്ന് രമേശ് പിഷാരടി അറിയിച്ചു. എന്നാൽ താൻ ഭാരവാഹിത്വം ഏറ്റെടുക്കില്ലെന്നും അദ്ദേഹം വ്യക്തമാക്കി. വിവിധ താരങ്ങളുമായി ചർച്ചകൾ നടന്നുവരികയാണെന്നും അദ്ദേഹം പറഞ്ഞു. ജനറൽ ബോഡി യോഗത്തിലെ വിവാദങ്ങളും ഭരണസമിതി രാജിയും പിന്നാലെ സംഘടനയിൽ അസ്വസ്ഥതകൾ തുടരുകയാണ്. ചില താരങ്ങൾ രാജി പ്രഖ്യാപിക്കുകയും ആരോപണങ്ങൾ ഉയർത്തുകയും ചെയ്തിരുന്നു.
ജൂൺ ഒന്നിന് അൻസിബ ടിനി ടോമിനെതിരെ പൊലീസിൽ പരാതി നൽകിയിരുന്നു. അപവാദ പ്രചാരണം നടത്തിയെന്നായിരുന്നു പരാതി. എന്നാൽ ആരോപണങ്ങൾ ടിനി ടോം നിഷേധിച്ചിരുന്നു. തുടർന്ന് വിഷയത്തിൽ സംഘടനയ്ക്കുള്ളിലും സിനിമാ മേഖലയിലും ഭിന്നത തുടരുകയാണ്.
