കോഴിക്കോട്: കോളേജുകളുടെ എൻഎസ്എസിന്റെ സപ്തദിന സഹവാസ ക്യാമ്പിന്റെ ഭാഗമായി ലഹരി വിരുദ്ധ ബോധവൽക്കരണ റാലി സംഘടിപ്പിച്ചു. മാമ്പറ്റ ഡോൺ ബോസ്കോ കോളേജ്, തിരുവമ്പാടി അൽഫോൻസ കോളേജ്, കോഴിക്കോട് ഹോളിക്രോസ് കോളേജ്, എന്നീ വിദ്യാഭ്യാസ സ്ഥാപനങ്ങളുടെ എൻഎസ്എസ് യൂണിറ്റുകളുടെ സംയുക്ത ആഭിമുഖ്യത്തിലായിരുന്നു റാലി.
ലഹരി മരുന്നുകളുടെ ദോഷഫലങ്ങളും, യുവതലമുറയെ അത് നശിപ്പിക്കുന്ന ആഘാതങ്ങളും സമൂഹ ശ്രദ്ധയിൽപ്പെടുത്തുക എന്ന ഉദ്ദേശ്യത്തോടെ കോടഞ്ചേരി ഹയർ സെക്കൻഡറി സ്കൂളിൽ നിന്നും ആരംഭിച്ച റാലി അങ്ങാടിയിലെ പ്രധാന വഴികളിലൂടെ സഞ്ചരിച്ചു.
“ലഹരി ജീവിതത്തെ നശിപ്പിക്കും”, “സ്വസ്ഥമാം ജീവിതത്തിന് ലഹരി വിടപറയാം” എന്നിങ്ങനെ സന്ദേശങ്ങൾ ഉയർത്തിപ്പിടിച്ചുള്ള പ്രമേയപടങ്ങൾ, ബാനറുകൾ, കൈയ്യെഴുത്ത് പോസ്റ്ററുകൾ, മുദ്രാവാക്യങ്ങൾ എന്നിവ റാലിയെ കൂടുതൽ ശ്രദ്ധേയമാക്കി.റാലിയുടെ ഉദ്ഘാടനം കോടഞ്ചേരി പഞ്ചായത്ത് പ്രസിഡണ്ട് അന്നക്കുട്ടി ദേവസ്യ നിർവഹിച്ചു. വൈസ് പ്രസിഡണ്ട് അലക്സ് തോമസ്, പഞ്ചായത്ത് അംഗങ്ങൾ, സാമൂഹിക പ്രവർത്തകർ, ജനപ്രതിനിധികൾ എന്നിവർ റാലിയിൽ പങ്കെടുത്തു.
ലഹരിവിരുദ്ധ ബോധവൽക്കരണത്തിൽ വിദ്യാർത്ഥികളുടെ ഇടപെടലിന്റെ പ്രാധാന്യത്തെക്കുറിച്ച് ഉദ്ഘാടകൻ സംസാരിച്ചു. എൻഎസ്എസ് പ്രോഗ്രാം ഓഫീസർമാരായ ഫാ. ഷിജു മാത്യു, ജിജി ജോർജ് , ലിജോ ജോസഫ്എക്സൈസ് ഓഫീസർ ഷഫീഖ് അലി എന്നിവർ റാലിക്ക് നേതൃത്വം നൽകി. റാലിയിൽ വിവിധ കോളേജുകളിൽ നിന്നായി 150 എൻഎസ്എസ് വിദ്യാർത്ഥികളും, അധ്യാപകരും പങ്കെടുത്തു.
വിദ്യാർത്ഥികളുടെ ഊർജ്ജസ്വലമായ പങ്കാളിത്തവും സമൂഹത്തിൽ നിന്നുള്ള മികച്ച പിന്തുണയും റാലിക്ക് കൂടുതൽ ഉൾക്കാഴ്ച നൽകി. ക്യാമ്പിൽ ഇവർ വിവിധ ആരോഗ്യ, പരിസ്ഥിതി, സമൂഹ വികസന പ്രവർത്തനങ്ങളിലും പങ്കുചേരുമെന്ന് ക്യാമ്പ് ഓഫീസറായ സന്തോഷ് മരുതോലിൽ അറിയിച്ചു.
