തൃപ്പൂണിത്തുറ: പൂക്കളും പൂവിളികളുമായി കേരളം ഓണത്തെ വരവേൽക്കുന്നു. ഓണാഘോഷങ്ങൾക്ക് തുടക്കം കുറിച്ച് തൃപ്പൂണിത്തുറയിൽ അത്തച്ചമയ ഘോഷയാത്രയ്ക്ക് തുടക്കമായി. തൃപ്പൂണിത്തുറ ഗവ. ബോയ്സ് സ്കൂൾ മൈതാനിയിൽ രാവിലെ ഒമ്പതിന് മുഖ്യമന്ത്രി വി.ഡി. സതീശൻ അത്താഘോഷം ഉദ്ഘാടനം ചെയ്തു. നടൻ ജഗദീഷും മന്ത്രി അനൂപ് ജേക്കബും ചേർന്നാണ് ഘോഷയാത്ര ഫ്ലാഗ് ഓഫ് ചെയ്തത്.
കേരളത്തിന്റെ വിവിധ ഭാഗങ്ങളിൽ നിന്നെത്തിയ കലാകാരന്മാർ തനത് കലാരൂപങ്ങളും വാദ്യഘോഷങ്ങളും ഘോഷയാത്രയിൽ അവതരിപ്പിച്ചു. നിശ്ചലദൃശ്യങ്ങളും വിവിധ കലാരൂപങ്ങളും അണിനിരന്ന വർണാഭമായ ഘോഷയാത്ര കാണാൻ പതിനായിരങ്ങളാണ് തൃപ്പൂണിത്തുറയിലെത്തിയത്. ചെറുമഴയ്ക്ക് ശേഷവും ആഘോഷത്തിമിർപ്പിലാണ് നഗരം.
കൊച്ചി രാജഭരണകാലത്തെ അത്തച്ചമയത്തിന്റെ ഓർമകൾ പുതുക്കുന്നതാണ് ഇത്തവണത്തെ ഘോഷയാത്ര. അത്തം നഗറിൽ നിന്ന് ആരംഭിച്ച ഘോഷയാത്ര ബസ് സ്റ്റാൻഡ് റോഡ്, സ്റ്റാച്യു, കിഴക്കേക്കോട്ട, എസ്.എൻ. ജങ്ഷൻ, വടക്കേക്കോട്ട, പൂർണത്രയീശ ക്ഷേത്രം റോഡ് എന്നിവിടങ്ങളിലൂടെ സഞ്ചരിച്ച് അത്തം നഗരിയിൽ തന്നെ സമാപിക്കും.
അത്താഘോഷത്തിന്റെ ഭാഗമായി സിയോൺ ഓഡിറ്റോറിയത്തിൽ അത്തപ്പൂക്കള മത്സരം നടക്കും. വൈകിട്ട് മൂന്ന് മുതൽ പൂക്കളങ്ങളുടെ പ്രദർശനവും ഉണ്ടാകും. ലായം കൂത്തമ്പലത്തിൽ വൈകിട്ട് കലാസന്ധ്യയ്ക്കും തുടക്കമാകും. വിവിധ ദിവസങ്ങളിലായി പ്രമുഖർ ഉൾപ്പെടെയുള്ളവരുടെ കലാപരിപാടികളും നടക്കും. ഓണാഘോഷ പരിപാടികൾ ഓഗസ്റ്റ് 25ന് സമാപിക്കും.
