തിരുവനന്തപുരം: അട്ടപ്പാടിയിൽ കഴിഞ്ഞ 10 മാസത്തിനിടെ 10 കുട്ടികൾ മരിച്ചതായി വി.കെ. ശ്രീകണ്ഠൻ എംപി. അട്ടപ്പാടിയിലെ ശിശുമരണങ്ങൾ ഗൗരവത്തോടെ കാണേണ്ട വിഷയമാണെന്നും പ്രദേശത്ത് അരിവാൾ രോഗം വ്യാപകമാണെന്നും അദ്ദേഹം പറഞ്ഞു.

അരിവാൾ രോഗം ഇല്ലാതാക്കാൻ മുൻ സർക്കാരുകളുടെ കാലത്ത് നിരവധി ശ്രമങ്ങൾ നടന്നിട്ടുണ്ട്. എന്നാൽ ഈ വിഷയത്തെ രാഷ്ട്രീയമായി കാണരുത്. പാലക്കാട്ടെ ചില രാഷ്ട്രീയ നേതാക്കൾ വിഷയം രാഷ്ട്രീയവത്കരിക്കുകയാണെന്നും മുൻമന്ത്രിമാർ ഉൾപ്പെടെയുള്ളവർ ഇത് ദുരുപയോഗം ചെയ്യുകയാണെന്നും ശ്രീകണ്ഠൻ വിമർശിച്ചു.

കഴിഞ്ഞ പത്ത് വർഷത്തിനിടെ അട്ടപ്പാടിയിൽ ശിശുമരണങ്ങൾ ഉണ്ടായിട്ടില്ലെന്ന തരത്തിൽ തെറ്റായ പ്രചാരണം നടത്തുകയാണ്. രാജേഷ് സ്പീക്കറും മന്ത്രിയുമായിരുന്ന കാലത്ത് 42 കുട്ടികളുടെ മരണം സംഭവിച്ചിട്ടുണ്ടെന്നും അദ്ദേഹം ആരോപിച്ചു. ഇക്കാര്യത്തിൽ രാജേഷിന്റെ പ്രസ്താവന നിരുത്തരവാദപരമാണെന്നും വി.കെ. ശ്രീകണ്ഠൻ എംപി കുറ്റപ്പെടുത്തി.