തിരുവനന്തപുരം: പിഎസ്‌സി പരീക്ഷാ ക്രമക്കേടുമായി ബന്ധപ്പെട്ട വിവാദങ്ങൾക്കിടെ പിഎസ്‌സി ചെയർമാനെ പിരിച്ചുവിടണമെന്ന ആവശ്യവുമായി പുതിയ ഗവർണർ ഓംപ്രകാശ് മാഥുറും രംഗത്ത്. ഇക്കാര്യത്തിൽ രാഷ്ട്രപതിക്ക് ശുപാർശ കത്തയക്കാനാണ് തീരുമാനമെന്ന് ബിജെപി നേതാക്കൾ അറിയിച്ചു. ഗവർണറുമായി നടത്തിയ കൂടിക്കാഴ്ചയ്ക്ക് പിന്നാലെയാണ് ബിജെപി എംഎൽഎമാർ ഇക്കാര്യം വ്യക്തമാക്കിയത്.
പിഎസ്‌സി പരീക്ഷാ ക്രമക്കേടുകളുമായി ബന്ധപ്പെട്ട് ഉയർന്ന പരാതികളുടെ പശ്ചാത്തലത്തിൽ മുൻ ഗവർണർ രാജേന്ദ്ര ആർലേക്കർ പിഎസ്‌സി ചെയർമാൻ ഉൾപ്പെടെയുള്ള ഭരണസമിതിയെ പിരിച്ചുവിടണമെന്ന് ആവശ്യപ്പെട്ട് രാഷ്ട്രപതിക്ക് ശുപാർശ കത്ത് നൽകിയിരുന്നു. ഗവർണർ സ്ഥാനം ഒഴിയുന്നതിന് തൊട്ടുമുമ്പായിരുന്നു ഈ നീക്കം. മുൻ ഗവർണറുടെ നടപടിയിൽ തുടർനടപടികൾ വേണമെന്നാണ് ബിജെപിയുടെ നിലപാട്.
ബിജെപി സംസ്ഥാന അധ്യക്ഷനും എംഎൽഎയുമായ രാജീവ് ചന്ദ്രശേഖറിന്റെ നേതൃത്വത്തിലുള്ള പ്രതിനിധി സംഘമാണ് ഇന്ന് ഗവർണറെ സന്ദർശിച്ചത്. പിഎസ്‌സിക്കെതിരെ ഉയർന്ന ആരോപണങ്ങളും പരാതികളും മുൻ ഗവർണർ സ്വീകരിച്ച നിലപാടും സംഘം ഗവർണറുടെ ശ്രദ്ധയിൽപ്പെടുത്തി. ഇതിന് പിന്നാലെയാണ് പുതിയ ഗവർണറും രാഷ്ട്രപതിക്ക് ശുപാർശ കത്ത് നൽകുമെന്ന വിവരം ബിജെപി നേതാക്കൾ പുറത്തുവിട്ടത്. ഇന്ന് തന്നെ കത്ത് നൽകുമെന്നാണ് ബിജെപി അറിയിച്ചിരിക്കുന്നത്.
പിഎസ്‌സിയുമായി ബന്ധപ്പെട്ട വിഷയങ്ങൾ നിയമസഭയിൽ ചർച്ച ചെയ്യാൻ ഭരണപക്ഷം തയ്യാറായില്ലെന്ന വിമർശനവും ബിജെപി എംഎൽഎമാർ ഉന്നയിച്ചിരുന്നു. തുടർന്ന് ബിജെപി പാർലമെന്ററി പാർട്ടി നേതാവ് ബി.ബി. ഗോപകുമാർ ഉൾപ്പെടെയുള്ളവർ ഗവർണറെ സമീപിക്കുകയായിരുന്നു.
സംസ്ഥാന സർക്കാരും പ്രതിപക്ഷവും വിഷയത്തിൽ ആവശ്യമായ ഇടപെടൽ നടത്തുന്നില്ലെന്നാണ് ബിജെപിയുടെ ആരോപണം. അതേസമയം, മുൻ ഗവർണർ രാഷ്ട്രപതിക്ക് കത്തയച്ചതുമായി ബന്ധപ്പെട്ട് സംസ്ഥാന സർക്കാരിനും പിഎസ്‌സിക്കും ഇടയിൽ ആശയക്കുഴപ്പം നിലനിൽക്കുന്നുണ്ടെന്നാണ് റിപ്പോർട്ടുകൾ. കത്ത് നൽകിയ കാര്യം അറിയില്ലെന്നായിരുന്നു മന്ത്രിമാരടക്കം നേരത്തെ പ്രതികരിച്ചത്.
അതിനിടെ, പിഎസ്‌സി പരീക്ഷാ ക്രമക്കേടുമായി ബന്ധപ്പെട്ട ക്രൈംബ്രാഞ്ച് അന്വേഷണം പുരോഗമിക്കുകയാണ്. പ്രത്യേക അന്വേഷണ സംഘത്തിന്റെ നേതൃത്വത്തിൽ പിഎസ്‌സി ചെയർമാൻ ഉൾപ്പെടെയുള്ളവരെ ചോദ്യം ചെയ്തിട്ടുണ്ട്. പിഎസ്‌സിയിലെ രണ്ട് പ്രധാന ഉദ്യോഗസ്ഥർ കേസിൽ പ്രതികളായിട്ടുമുണ്ട്.
പിഎസ്‌സി പരീക്ഷാ ക്രമക്കേട് അന്വേഷണം പുരോഗമിക്കുന്നതിനിടെ ഗവർണറുടെ ഭാഗത്തുനിന്നുണ്ടാകുന്ന പുതിയ നീക്കം വിഷയത്തെ വീണ്ടും രാഷ്ട്രീയ ചർച്ചകളിലേക്ക് എത്തിച്ചിരിക്കുകയാണ്.
