മാഡ്രിഡ്: എല് ക്ലാസിക്കോയില് റയല് മാഡ്രിഡിനെ തോല്പിച്ച് ബാഴ്സലോണ. മൂന്നിനെതിരെ നാല് ഗോളിനായിരുന്നു ബാഴ്സയുടെ ജയം.റയലിന്റെ ഹോം ഗ്രൗണ്ടായ സാന്റിയാഗോ ബെര്ണാബ്യൂവിലാണ് മത്സരം നടന്നത്.ആദ്യ 15 മിനിറ്റിനിടെ കിലിയന് എംബാപ്പേയുടെ രണ്ട് ഗോളിന് മുന്നിട്ടുനിന്ന ശേഷമായിരുന്നു റയലിന്റെ തോല്വി.
ബാഴ്സലോണയ്ക്കായി റഫീഞ്ഞ രണ്ടും എറിക് ഗാര്സ്യയും ലാമിന് യമാലും ഓരോ ഗോളും നേടി. റയലിനായി കിലിയന് എംബാപ്പേ ഹാട്രിക് നേടി. സീസണില് നാലാം തവണയാണ് ബാഴ്സലോണ നിലവിലെ ചാമ്പ്യന്മാരായ റയല് മാഡ്രിഡിനെ തോല്പിക്കുന്നത്. മൂന്ന് കളി ശേഷിക്കേ രണ്ടാം സ്ഥാനത്തുള്ള റയല് മാഡ്രിഡിനേക്കാള് ഏഴ് പോയന്റ് മുന്നിലാണ് ബാഴ്സലോണ. അവശേഷിക്കുന്ന മൂന്ന് കളികളില് ഒരെണ്ണം ജയിച്ചാല് ബാഴ്സക്ക് 28-ാം ലാ ലിഗ കിരീടം സ്വന്തമാക്കാം. കോച്ച് കാര്ലോ ആഞ്ചലോട്ടിക്ക് കീഴില് റയലിന്റെ അവസാന എല് ക്ലാസിക്കോ ആയിരുന്നു ഇത്. തോല്വിയോടെ റയലിന്റെ കിരീടപ്രതീക്ഷകള് ഏറക്കുറെ അവസാനിച്ചു.
അഞ്ചാം മിനിറ്റില് ഗോള് കീപ്പറുടെ ഫൗളില് നിന്ന് ലഭിച്ച പെനല്റ്റി ഗോളാക്കിയതോടെയാണ് ് എംബാപ്പെ റയലിനെ മുന്നിലെത്തിച്ചത്. ഒമ്പത് മിനിറ്റുകള്ക്ക് ശേഷം വിനീഷ്യസ് ജൂനിയറുടെ അസിസ്റ്റില് രണ്ടാം ഗോളും നേടി എംബാപ്പെ റയലിന് വ്യക്തമായ മുന്തൂക്കം നല്കി. ഇതോടെ റയലിനായി അരങ്ങേറ്റ സീസിണില് ഏറ്റവും ഗോളടിക്കുന്ന താരമെന്ന റെക്കോര്ഡും എംബാപ്പെ സ്വന്തമാക്കി. സീസണില് റയല് കുപ്പായക്കില് എംബാപ്പെയുടെ 38-ാം ഗോളായിരുന്നു ഇത്. 1992-93ലെ അരങ്ങേറ്റ സീസണില് റയലിനായി 37 ഗോളുകള് നേടിയ ചിലയന് താരം ഇവാന് സൊമറാനോയുടെ റെക്കോര്ഡാണ് എംബാപ്പെ തകര്ത്തത്.
എന്നാല് പത്തൊമ്പാതാം മിനിറ്റില് ബാഴ്സക്കായി ഫെറാന് ടോറസിന്റെ കോര്ണറില് നിന്ന് എറിക് ഗാര്സ്യ ഒരു ഗോള് മടക്കി. പിന്നീട് നിരന്തര ആക്രമണം തുടര്ന്ന ബാഴ്സക്കായി 32- ാം മിനിറ്റില് ലാമീന് യമാല് സമനില ഗോള് നേടി. രണ്ട് മിനിറ്റിനകം ഒരു ഗോള് കൂടി നേടിയ റഫീഞ്ഞ ബാഴ്സക്ക് ലീഡ് സമ്മാനിച്ചു. ഇടവേളക്ക് തൊട്ടു മുമ്പ് 45ാം മിനിറ്റില് രണ്ടാം ഗോളും നേടി റഫീഞ്ഞ ബാഴ്സയെ രണ്ടടി മുന്നിലെത്തിച്ച് ആധിപത്യം തിരിച്ചുപിടിച്ചു. 70-ാം മിനിറ്റില് ഹാട്രിക് പൂര്ത്തിയാക്കിയ എംബാപ്പെ ഒരു ഗോള് കൂടി മടക്കിയെങ്കിലും ബാഴ്സ പ്രതിരോധത്തെ പിന്നീട് മറികടക്കാനായില്ല.
