തൃശൂര്‍: ലോറൻസ് ബിഷ്‌ണോയിയുടെ അധോലോക സംഘവുമായി ബന്ധം പുലർത്തുകയും ബോളിവുഡ് താരങ്ങളുടെയും പ്രധാന കേന്ദ്രങ്ങളുടെയും വിവരങ്ങൾ ചോർത്തി നൽകുകയും ചെയ്ത കേസിൽ അറസ്റ്റിലായ തമിഴ്നാട് സ്വദേശി ഗുരുമൂർത്തിയെക്കുറിച്ച് കൂടുതൽ വിവരങ്ങൾ പുറത്ത്. 27കാരനായ ഗുരുമൂർത്തി ഫോട്ടോഗ്രാഫറാണെന്നാണ് അന്വേഷണത്തിൽ വ്യക്തമായത്. ചിത്രങ്ങൾ പകർത്തി നൽകിയതിന് പ്രതിഫലമായി ഇയാൾക്ക് പലതവണ യുഎസ് ഡോളറിൽ പണം ലഭിച്ചിരുന്നു. ഓരോ തവണയും ഏകദേശം 20,000 രൂപയ്ക്ക് തുല്യമായ തുകയാണ് പ്രതിഫലമായി നൽകിയിരുന്നത്. ഭാര്യയുടെ ബാങ്ക് അക്കൗണ്ട് വഴിയാണ് ഈ തുക ഇന്ത്യൻ രൂപയാക്കി മാറ്റിയിരുന്നതെന്നും അന്വേഷണസംഘത്തിന് വിവരം ലഭിച്ചിട്ടുണ്ട്.
നവി മുംബൈയിലെ ഹോട്ടലിൽ ജോലി ചെയ്തിരുന്ന കാലത്താണ് ഗുരുമൂർത്തി ബിഷ്‌ണോയ് സംഘവുമായി ബന്ധം സ്ഥാപിക്കുന്നത്. ടെലിഗ്രാം ആപ്പ് വഴിയായിരുന്നു സംഘാംഗങ്ങളുമായുള്ള ആശയവിനിമയം. മുംബൈയിലെ പ്രധാന കേന്ദ്രങ്ങളുടെയും ബോളിവുഡ് താരങ്ങൾ പതിവായി സന്ദർശിക്കുന്ന സ്ഥലങ്ങളുടെയും ചിത്രങ്ങൾ മൊബൈൽ ഫോണിൽ പകർത്തി ഇയാൾ സംഘാംഗങ്ങൾക്ക് കൈമാറിയെന്നാണ് കണ്ടെത്തൽ. ഈ ചിത്രങ്ങൾ ഭീകരസംഘങ്ങളുടെ കൈകളിലും എത്തിയിട്ടുണ്ടെന്നാണ് അന്വേഷണസംഘത്തിന്റെ സംശയം. ബോളിവുഡ് നടൻ ടൈഗർ ഷ്‌റോഫിന് നേരെ നടന്ന വെടിവയ്പ്പുമായി ബന്ധമുള്ള സംഘമാണ് ലോറൻസ് ബിഷ്‌ണോയിയുടേത്.
കേന്ദ്ര ഇന്റലിജൻസ് ബ്യൂറോ നൽകിയ രഹസ്യവിവരത്തിന്റെ അടിസ്ഥാനത്തിൽ തൃശൂർ എസിപി ടി.ആർ. രാജേഷിന്റെ നേതൃത്വത്തിലുള്ള പൊലീസ് സംഘമാണ് പാലക്കാട് ഒറ്റപ്പാലത്തിന് സമീപം തൃക്കങ്ങോട്ടുനിന്ന് ഗുരുമൂർത്തിയെ കസ്റ്റഡിയിലെടുത്തത്. ബുധനാഴ്ച അർധരാത്രിയോടെ സ്ഥലത്തെത്തിയ അന്വേഷണസംഘം മണിക്കൂറുകളോളം ചോദ്യം ചെയ്ത ശേഷമാണ് വ്യാഴാഴ്ച പുലർച്ചെ അഞ്ചുമണിയോടെ തൃശൂരിലേക്ക് കൊണ്ടുപോയത്. രാജ്യസുരക്ഷയെ ബാധിക്കുന്ന ഭീകരപ്രവർത്തനങ്ങളിൽ ഏർപ്പെട്ടെന്നും കുറ്റവാളികളെ സഹായിച്ചെന്നും ആരോപിച്ച് യുഎപിഎ ചുമത്തിയിട്ടുണ്ട്. തുടർന്ന് വിയ്യൂർ അതിസുരക്ഷാ ജയിലിൽ റിമാൻഡ് ചെയ്തു. കേസ് ദേശീയ അന്വേഷണ ഏജൻസി (എൻഐഎ) ഏറ്റെടുക്കുമെന്നാണ് വിവരം.
തമിഴ്നാട്ടിലെ തിരുനെൽവേലി സ്വദേശിയാണ് ഗുരുമൂർത്തി. നവി മുംബൈയിൽനിന്ന് തമിഴ്നാട് വഴി കേരളത്തിലെത്തിയ ഇയാൾ കഴിഞ്ഞ നാലുമാസത്തോളമായി ഒറ്റപ്പാലത്താണ് താമസിച്ചിരുന്നത്. വാണിയംകുളത്തും ഒറ്റപ്പാലത്തുമുള്ള സ്ഥാപനങ്ങളിൽ ജോലി ചെയ്ത ശേഷമാണ് മെയ് മാസത്തിൽ തൃക്കങ്ങോട്ടെ സ്ഥാപനത്തിൽ ജോലിയിൽ പ്രവേശിച്ചത്. ഏഴുമാസത്തോളമായി ഈ സ്ഥാപനം പ്രവർത്തിക്കുന്ന കെട്ടിടത്തിന്റെ മുകൾനിലയിൽ തമിഴ്നാട് സ്വദേശിനിയായ ഭാര്യയോടൊപ്പമായിരുന്നു താമസം.
നാട്ടുകാർക്കും പരിചയക്കാർക്കും ഗുരുമൂർത്തിയെക്കുറിച്ച് നല്ല അഭിപ്രായമായിരുന്നു. മാന്യമായ പെരുമാറ്റവും സാമ്പത്തിക ഇടപാടുകളിൽ കൃത്യതയും പുലർത്തിയിരുന്ന ഇയാൾക്ക് ഇംഗ്ലീഷ് ഉൾപ്പെടെ വിവിധ ഭാഷകളിൽ പ്രാവീണ്യമുണ്ടായിരുന്നു. ദീപാവലിക്ക് തൊട്ടുമുമ്പാണ് ഭാര്യ സ്വന്തം നാടായ തമിഴ്നാട്ടിലേക്ക് പോയത്. അതേസമയം, ഗുരുമൂർത്തിയുടെ തിരിച്ചറിയൽ രേഖയിൽ നൽകിയിരിക്കുന്ന വിലാസം അനാഥാലയം നടത്തുന്ന ഒരു സൊസൈറ്റിയുടേതാണെന്ന കാര്യത്തിലും പൊലീസിന് സംശയമുണ്ട്.
തൃശൂർ ഈസ്റ്റ് പൊലീസ് സ്റ്റേഷൻ പരിധിയിൽ നടന്ന ചില ഗൂഢാലോചനകളിൽ ഗുരുമൂർത്തിക്ക് പങ്കുണ്ടോയെന്നും അന്വേഷിക്കുന്നുണ്ട്. ചിത്രങ്ങൾ പകർത്താൻ ഉപയോഗിച്ച മൊബൈൽ ഫോൺ കണ്ടെത്തുന്നതിനായി ഇയാളുമായി പൊലീസ് സംഘം തമിഴ്നാട്ടിലെ ഉദുമൽപേട്ടയിലുള്ള ഭാര്യവീട്ടിലെത്തി തെളിവെടുപ്പ് നടത്തി. അധോലോക സംഘവുമായുള്ള ബന്ധവും രാജ്യസുരക്ഷയുമായി ബന്ധപ്പെട്ട ആശങ്കകളും കണക്കിലെടുത്ത് കേന്ദ്ര ഏജൻസികളും അന്വേഷണം ശക്തമാക്കിയിട്ടുണ്ട്.
