ജയ്പുർ: ബോംബ് ഭീഷണിയെ തുടർന്ന് ജർമനിയിലെ ഫ്രാങ്ക്ഫർട്ടിൽ നിന്ന് ന്യൂഡൽഹിയിലേക്ക് വരികയായിരുന്ന എയർ ഇന്ത്യ വിമാനം അടിയന്തരമായി ജയ്പുരിൽ ഇറക്കി. ബുധനാഴ്ച രാവിലെ 9.45ഓടെയായിരുന്നു സംഭവം. ബോംബ് ഭീഷണി സന്ദേശത്തെ തുടർന്നാണ് വിമാനം വഴിതിരിച്ചുവിട്ടതെന്ന് വാർത്താ ഏജൻസികൾ റിപ്പോർട്ട് ചെയ്തു.

എയർ ഇന്ത്യയുടെ എഐ-2030 ബോയിങ് ഡ്രീംലൈനർ വിമാനമാണ് ജയ്പുർ വിമാനത്താവളത്തിൽ സുരക്ഷിതമായി ഇറക്കിയത്. വിമാനത്തിലുണ്ടായിരുന്ന യാത്രക്കാരും ജീവനക്കാരും സുരക്ഷിതരാണെന്ന് അധികൃതർ അറിയിച്ചു.

വിമാനം ഇറങ്ങിയ ഉടൻ സുരക്ഷാ ഉദ്യോഗസ്ഥർ പരിശോധന ആരംഭിച്ചു. യാത്രക്കാരെ പുറത്തിറക്കിയ ശേഷമാണ് വിവിധ സുരക്ഷാ വിഭാഗങ്ങൾ വിമാനത്തിൽ വിശദമായ പരിശോധന നടത്തിയത്. പിന്നീട് ബോംബ് ഭീഷണി സന്ദേശം വ്യാജമാണെന്ന് സ്ഥിരീകരിച്ചു.

വ്യാജ ഭീഷണി സന്ദേശത്തിന്റെ ഉറവിടം കണ്ടെത്തുന്നതിനായി സുരക്ഷാ ഏജൻസികൾ അന്വേഷണം ആരംഭിച്ചിട്ടുണ്ട്.