ഇരിങ്ങാലക്കുട: കുടല്മാണിക്യ ക്ഷേത്രത്തിലെ ജാതി വിവേചനത്തിനെതിരെ പ്രതിഷേധം ശക്തമാക്കി വിവിധ സംഘടനകള് രംഗത്ത്. വിവിധ രാഷ്ട്രീയ കക്ഷികളും സമുദായ സംഘടനകളും ഇതിനെതിരെ രംഗത്തെത്തിയിട്ടുണ്ട്. കഴകം പ്രവര്ത്തിക്ക് നിയമിതനായ ഈഴവ സമുദായത്തില്പ്പെട്ട തിരുവനന്തപുരം ആര്യനാട് സ്വദേശി വി എ ബാലുവിനെ തന്ത്രിമാരുടെ സമ്മര്ദത്തെ തുടര്ന്ന് മാറ്റിനിര്ത്തി എന്നായിരുന്നു ഉയര്ന്നുവന്ന ആരോപണം.
കഴിഞ്ഞ മാസം 24നാണ് ഇരിങ്ങാലക്കുട കൂടല്മാണിക്യം ക്ഷേത്രത്തില് കഴക പ്രവൃത്തിക്കാരനായി ബാലു ചുമതലയേറ്റത്. അദ്ദേഹം ഈഴവ സമുദായ അംഗമായതിനാല് കഴകപ്രവര്ത്തിയില് നിന്ന് മാറ്റി നിര്ത്തണമെന്ന് തന്ത്രിമാരും വാര്യര് സമാജവും ആവശ്യപ്പെട്ടു. ഇരിങ്ങാലക്കുടയിലെ ആറു തന്ത്രി കുടുംബ അംഗങ്ങള് ക്ഷേത്ര ചടങ്ങുകളില് നിന്ന് അന്ന് മുതല് വിട്ടുനില്ക്കുകയും ചെയ്തിരുന്നു.
സാങ്കേതിക പ്രശ്നങ്ങളെ തുടര്ന്നാണ് മാറ്റിയത് എന്നാണ് ദേവസ്വം ബോര്ഡ് നല്കിയ വിശദീകരണം. ഇന്ന് പ്രതിഷ്ഠാദിന ചടങ്ങുകള് നടക്കേണ്ടതിനാല് ഏഴാം തീയതി ഭരണസമിതി ചര്ച്ച വിളിച്ചു. തുടര്ന്നാണ് ബാലുവിനെ ഓഫീസ് ജോലികളിലേക്ക് മാറ്റാനുള്ള തീരുമാനം ഉണ്ടായത്. പ്രതിഷ്ഠാദിനം കഴിഞ്ഞാല് ബാലുവിനെ കഴക പ്രവര്ത്തി സ്ഥാനത്ത് പുനസ്ഥാപിക്കുമെന്ന് ദേവസ്വം ബോര്ഡ് വ്യക്തമാക്കി.
