ഇടുക്കി: അടിമാലിയില്‍ ഉണ്ടായ മണ്ണിടിച്ചിലില്‍ ഒരാള്‍ മരിച്ച സംഭവത്തില്‍ അസ്വാഭാവിക മരണത്തിന് കേസെടുത്ത് പൊലീസ്. കേസില്‍ നിലവില്‍ ആരെയും പ്രതി ചേര്‍ത്തിട്ടില്ല. വിശദമായ അന്വേഷണത്തിന് ശേഷം തുടര്‍നടപടികളെന്നാണ് പൊലീസ് പറയുന്നത്. മണ്ണിടിച്ചിലില്‍ വീടിനുള്ളില്‍ കുടുങ്ങിയ നിലയിലാണ് ബിജുവിനെ കണ്ടെത്തിയത്. ഏഴ് മണിക്കൂറോളം നീണ്ട രക്ഷാപ്രവര്‍ത്തനത്തിനൊടുവില്‍ ബിജുവിനെ പുറത്തെത്തിക്കാന്‍ സാധിച്ചെങ്കിലും ജീവന്‍ രക്ഷിക്കാനായില്ല. ബിജുവിന്റെ ഭാര്യ സന്ധ്യ പരിക്കുകളേടെ ആശുപത്രിയില്‍ ചികിത്സയിലാണ്. കൂമ്പന്‍പാറ ലക്ഷം വീട് ഉന്നതിയെ, ഏതാണ്ട് പൂര്‍ണമായി തുടച്ചുനീക്കിയ മണ്ണിടിച്ചില്‍. ശനിയാഴ്ച രാത്രി പത്തരയോടെയായിരുന്നു അപകടം. […]