തിരുവനന്തപുരം: ഭൂപതിവ് ചട്ടത്തിലെ പട്ടയ വ്യവസ്ഥകൾ ക്രമീകരിച്ച് നൽകുന്നതിനുള്ള പുതിയ സോഫ്റ്റ്‌വെയർ തയ്യാറായതായി റവന്യൂ മന്ത്രി കെ. രാജൻ അറിയിച്ചു. പൊതുജനങ്ങൾക്ക് എളുപ്പത്തിൽ ഉപയോഗിക്കാവുന്ന രീതിയിലാണ് സോഫ്റ്റ്‌വെയർ വികസിപ്പിച്ചതെന്നും, മൂന്ന് വിഭാഗങ്ങളിലായി അപേക്ഷ സമർപ്പിക്കാനുള്ള സൗകര്യം ഒരുക്കിയിട്ടുണ്ടെന്നും മന്ത്രി വ്യക്തമാക്കി. പട്ടയ വ്യവസ്ഥാ ലംഘനങ്ങൾ ക്രമീകരിച്ച് നൽകുന്നതിനായി നാഷണൽ ഇൻഫർമാറ്റിക്‌സ് സെന്റർ (എൻഐസി) ആണ് സോഫ്റ്റ്‌വെയർ വികസിപ്പിച്ചത്. അപേക്ഷ സമർപ്പിക്കുന്നത് മുതൽ ചലാൻ അടയ്ക്കുന്നതും ഉത്തരവ് ലഭിക്കുന്നതും വരെ എല്ലാ നടപടിക്രമങ്ങളും പൂർണ്ണമായും ഓൺലൈൻ വഴിയാണ് നടപ്പാക്കുന്നത്. […]