ന്യൂഡല്ഹി: ഡല്ഹിയില് സിബിസിഐയുടെ (കാത്തലിക് ബിഷപ്പ്സ് കോണ്ഫറന്സ് ഓഫ് ഇന്ത്യ) ആസ്ഥാനത്ത് നടക്കുന്ന ക്രിസ്മസ് ആഘോഷപരിപാടികളിൽ പങ്കെടുക്കാൻ പ്രധാനമന്ത്രി നരേന്ദ്ര മോദി .
ഡിസംബർ 23ന് വൈകുന്നേരം ആറര മണിയോടുകൂടി ആരംഭിക്കുന്ന പരിപാടിയിൽ മുഖ്യാതിഥിയായി പങ്കെടുക്കും. പ്രധാനമന്ത്രി പങ്കെടുക്കുന്ന വിവരം സിബിസിഇ സ്ഥിരീകരിച്ചു.
സിബിസിഐ പ്രസിഡന്റ് ആര്ച്ച് ബിഷപ്പ് ആന്ഡ്രൂസ് താഴത്താണ് പരിപാടികള്ക്ക് അധ്യക്ഷത വഹിക്കുന്നത്. നിരവധി മതപുരോഹിതന്മാര്, പൗരപ്രമുഖര്, ഉദ്യോഗസ്ഥര് തുടങ്ങിയവരും പങ്കെടുക്കും. കരോള് ഗാനങ്ങളും, അത്താഴവിരുന്നുകളോടു കൂടി ആഘോഷപരിപാടികള് സമാപിക്കുമെന്ന് സിബിസിഐ ഡെപ്യൂട്ടി സെക്രട്ടറി ജനറല് റവ. ഡോ. മാത്യു കോയിക്കല് അറിയിച്ചു. ക്രിസ്മസ് ആഘോഷത്തിന്റെ ഭാഗമായി കഴിഞ്ഞ വര്ഷം രാജ്യത്തെ ക്രൈസ്തവ നേതാക്കളെ പ്രധാനമന്ത്രി തന്റെ ഔദ്യോഗിക വസതിയിലേക്ക് ക്ഷണിച്ച് വിരുന്ന് നല്കിയിരുന്നു.
ഇന്ത്യയിലെ കാത്തലിക് ബിഷപ്പുമാരുടെ സംഘടനയാണ് സിബിസിഐ. 1944 സെപ്തംബറിലാണ് സംഘടന രൂപീകൃതമായത്. ഇത് ആദ്യമായാണ് സിബിസിഇ ആസ്ഥാനത്ത് നടക്കുന്ന ആഘോഷങ്ങളില് പ്രധാനമന്ത്രി പങ്കുചേരുന്നത്.
