തൃശ്ശൂർ: ചാലക്കുടി നഗരസഭയൊരുക്കിയ ഹരിത മാതൃക പോളിംങ്ങ് ബൂത്ത് വേറിട്ട കാഴ്ചയാവുന്നു. ചാലക്കുടി ബോയിസ് ഹൈസ്ക്കുളിലാണ് ചാലക്കുടി നഗരസഭയിലെ ഹരിത ബൂത്തൊരുക്കിയിരിക്കുന്നത്. പോളിംങ്ങ് സ്റ്റേഷനിലെത്തുന്ന വോട്ടര്മാര്ക്ക് ഫോട്ടോ എടുക്കാന് സെല്ഫി പോയിന്റ് വരെ ഒരുക്കിയിട്ടുണ്ട് ഹരിത ബൂത്തില്. ഓരോ തദ്ദേശ സ്വയം ഭരണ സ്ഥാപനങ്ങളുടെ കീഴില് ഓരോ ഹരിത ബൂത്ത് നിര്മ്മിക്കണമെന്നാണ് ശുചിത മിഷന്റെ നിര്ദ്ദേശം. ഇവിടെ തെങ്ങിന്റെ പച്ചയോല മെടഞ്ഞാണ് മേല്ക്കുരയും വശങ്ങളും നിര്മ്മിച്ചിരിക്കുന്നത്.
സ്ക്കൂള് ഗേറ്റില് ഹരിത ബൂത്തിലേക്ക് സ്വാഗതം ആശംസിക്കുന്ന പച്ച ഓലയില് എഴുത്തിയ ബോര്ഡും,പ്ലാസ്റ്റിക് ഉപയോഗത്തിന്റെ ദൂഷ്യ വശങ്ങളും എല്ലാം ചെറിയ പോസ്റ്ററുകളായി പ്രദര്ശിപ്പിച്ചിട്ടുണ്ട്. പ്ലാസ്റ്റിക് കുപ്പികളും മറ്റും നിക്ഷേപിക്കാന് മുള കൊണ്ട് ഉണ്ടാക്കിയ കുപ്പി മോഡല് തൊട്ടിയും ഇവിടെയുണ്ട്. ഹരിത ബുത്തില് കടന്നു ചെന്നാല് ഒരു പോളിംങ്ങ് സ്റ്റേഷനില് ഉണ്ടാക്കുന്ന 3 പോളിംങ്ങ് ഓഫീസര് ഇരിക്കുന്ന സ്ഥലം,പ്രീസിഡിംങ്ങ് ഓഫീസറുടെ ഇരുപ്പിടം,കടലാസ് കൂടില് മറച്ച് വോട്ടിംങ്ങ് മെഷിനും ഒരുക്കിയിട്ടുണ്ട്.
ഹരിത ബൂത്തിനോട് ചേര്ന്നാണ് കുരുത്തോല കൊണ്ട് ആകര്ഷണമായി നിര്മ്മിച്ചിരിക്കുന്ന സെല്ഫി പോയിന്റും എല്ലാം ഏവരുടേയും ശ്രദ്ധയാകര്ഷിക്കും. ചാലക്കുടി നഗരസഭയിലെ ആരോഗ്യ വിഭാഗം ഉദ്യോഗസ്ഥരുടേയും, ജീവനക്കാരുടേയും രണ്ട് ദിവസത്തെ കഠിന പരിശ്രമത്തിന്റെ ഫലമായിട്ടാണ് ഹരിത ബൂത്ത് ഇത്ര മനോഹമരമാക്കി നിര്മ്മിക്കുവാന് സാധിച്ചത്. നഗരസഭ സെക്രട്ടറി കെ.പ്രമോദ്,സിറ്റി ക്ലീനിങ്ങ് മാനേജര് ജോണ് ദേവസ്യ, സ്പെഷ്യല് ഗ്രേഡ് ഹെല്ത്ത് ഇന്സ്പെക്ടര്മാരായ ഡിജി ടി.ഡി, ജോസഫ് തോമാസ്, ഹെല്ത്ത് ഇന്സ്പെക്ടര് ഗ്രേഡ് വണ് ഹരീഷ് പി, ഹെല്ത്ത് ഇന്സ്പെക്ടര്മാരായ ഷാലി വി ദാസ്,പ്രസീജ ബി, സുമിത ആര്.ഐ, സിനോ മരിയ, സജീഷ് പി.എസ്,. ശുചിത്വ മിഷന് ഉദ്യോഗസ്ഥരായ പി.എം.കീര്ത്തന,എം.എസ്.സോണിയ എന്നിവരുടെ നേതൃത്വത്തില് ആരോഗ്യ വിഭാഗം ജീവനക്കാരും ചേര്ന്നാണ് ഹരിത ബൂത്തൊരുക്കിയിരിക്കുന്നത്.
കുരുത്തോല കൊണ്ട് അലങ്കാര പണികളും കൂടിയായപ്പോള് ഹരിത ബൂത്ത് കാണുവാന് വേറിട്ട ചന്തമായി.പനയോല ബോര്ഡ് പോലെ വെച്ച് അതിലാണ് സന്ദേശങ്ങള് എഴുതി പ്രദര്ശിപ്പിച്ചിരിക്കുന്നത്. വാര്ഡ് 24 മൂന്സിപ്പല് ഓഫീസ് വാര്ഡും,വാര്ഡ് 25 ഐടിഐ വാര്ഡിലെ ബൂത്തുകളാണ് ഈ പോളിംങ്ങ് സ്റ്റേഷനില് തയ്യാറാക്കിയിരിക്കുന്നത്.ഈ വാര്ഡില് നിന്ന് വോട്ടു ചെയ്യാന് എത്തുന്നവര്ക്കുമായാണ് ഈ വേറിട്ട കാഴ്ചയൊരുക്കിയിരിക്കുന്നത്.
