തിരുവനന്തപുരം: രാജ്ഭവന് പ്രസിദ്ധീകരിക്കുന്ന ത്രൈമാസിക രാജഹംസിന്റെ പ്രകാശന കര്മ്മം നിര്വ്വഹിച്ച് മുഖ്യമന്ത്രി പിണറായി വിജയന്. പ്രകാശന പരിപാടിക്കിടെ ആദ്യ പതിപ്പിലെ ലേഖനത്തോടുള്ള വിയോജിപ്പ് ചടങ്ങില് പരസ്യമാക്കി മുഖ്യമന്ത്രി. നീണ്ട സര്ക്കാര്- ഗവര്ണര് പോരിനിടെയാണ് രാജഹംസിന്റെ പ്രകാശനം നിര്വ്വഹിക്കുന്നതിനായി മുഖ്യമന്ത്രി രാജ്ഭവനിലെത്തിയത്. ഭരണഘടനയിലെ ആര്ട്ടിക്കിള് 200 വ്യാഖ്യാനിച്ചുകൊണ്ടുള്ള ലേഖനത്തോടാണ് മുഖ്യമന്ത്രി വിമര്ശനം ഉയര്ത്തിയത്. രാജഹംസിന്റെ പ്രകാശനം മുഖ്യമന്ത്രി പിണറായി വിജയന് രാജ്ഭവനില് നിര്വ്വഹിച്ചു. ഗവര്ണറും മുഖ്യമന്ത്രിയും ചേര്ന്നാണ് നിലവിളക്ക് കൊളുത്തി ചടങ്ങ് ഉദ്ഘാടനം ചെയ്തത്. പ്രകാശന ചടങ്ങില് ഭാരതാംബ ചിത്രം ഉണ്ടായിരുന്നില്ല. നിലവിളക്ക് മാത്രമാണ് ഉണ്ടായിരുന്നത്. മാസിക ശശി തരൂരിന് നല്കിക്കൊണ്ടാണ് മുഖ്യമന്ത്രി പ്രകാശന കര്മം നിര്വ്വഹിച്ചത്.
സര്ക്കാരിന് പിന്തുണക്കുന്നതോ അല്ലാത്തതുമായ ലേഖനങ്ങള് മാസികയില് വരാമെന്നും അത്തരം അഭിപ്രായങ്ങള് ലേഖകന്റേത് മാത്രമാണെന്നും മാസിക പ്രകാശനം ചെയ്ത് കൊണ്ടുള്ള പ്രസംഗത്തില് മുഖ്യമന്ത്രി പറഞ്ഞു. വിരുദ്ധ അഭിപ്രായങ്ങള് സര്ക്കാരിനെ അലോസരപ്പെടുത്തില്ല. ആദ്യ പതിപ്പിലെ ലേഖനത്തില് ഗവര്ണറുടെ അധികാരങ്ങളും സര്ക്കാരിന്റെ അധികാരങ്ങളും രേഖപ്പെടുത്തിയിട്ടുണ്ട്. അതില് ലേഖകന് രേഖപ്പെടുത്തിയിരിക്കുന്നത് സര്ക്കാരിന്റെ അഭിപ്രായമല്ല. അത് ലേഖകന്റെ വ്യക്തിപരമായ അഭിപ്രായമായിരിക്കാം. അത് രാജ്ഭവന്റെ പേരില് വരുന്നു എന്ന് കരുതി അത് സര്ക്കാരിന്റെ അഭിപ്രായമാകില്ലെന്നും മുഖ്യമന്ത്രി പറഞ്ഞു.
