തിരുവനന്തപുരം: മെഡിക്കല് കോളജിലെ ഉപകരണക്ഷാമം സംബന്ധിച്ചു വിവാദ വെളിപ്പെടുത്തല് നടത്തിയ യൂറോളജി വിഭാഗം മേധാവി ഡോ.ഹാരിസിന് കാരണം കാണിക്കല് നോട്ടിസ്. ഡിഎംഇയാണു കാരണം കാണിക്കല് നോട്ടിസ് അയച്ചത്.. ഡോ.ഹാരിസിന് എതിരെ അച്ചടക്ക നടപടി ഉണ്ടാകുമെന്നു നേരത്തേ റിപ്പോര്ട്ടുണ്ടായിരുന്നു. എന്നാല് വിവിധ കോണുകളില്നിന്ന് പ്രതിഷേധം ഉയര്ന്ന സാഹചര്യത്തില് നടപടി വൈകിപ്പിക്കുകയായിരുന്നു.
ഉപകരണക്ഷാമം സംബന്ധിച്ച് ഡോ.ഹാരിസ് സമൂഹമാധ്യമത്തില് നടത്തിയ വെളിപ്പെടുത്തല് സര്ക്കാരിനു വലിയ പ്രതിസന്ധി സൃഷ്ടിച്ചിരുന്നു. തുടര്ന്ന് അന്വേഷണത്തിനായി സര്ക്കാര് വിദഗ്ധസമിതിയെ നിയോഗിക്കുകയും ചെയ്തു. ഡോക്ടര് നടത്തിയത് ഔദ്യോഗിക ചട്ടലംഘനമാണെന്നും നടപടി വേണ്ടെന്നുമാണു സമിതി റിപ്പോര്ട്ട് നല്കിയത്. സംവിധാനത്തിലെ പാളിച്ചകള് രോഗികള്ക്കു ബുദ്ധിമുട്ടുണ്ടാക്കുന്നുവെന്നു സമിതി വിലയിരുത്തി. ഉപകരണങ്ങള് വാങ്ങുന്നതിനുള്ള ഫയല് നീക്കത്തിലെ കാലതാമസവും അറ്റകുറ്റപ്പണികളിലെ മെല്ലെപ്പോക്കും റിപ്പോര്ട്ടില് ചൂണ്ടിക്കാട്ടിയിരുന്നു.
മെഡിക്കല് കോളജ് ആശുപത്രിയില് ശസ്ത്രക്രിയാ ഉപകരണങ്ങള് ഇല്ലാത്തതിനാല് ശസ്ത്രക്രിയകള് നിരന്തരം മാറ്റിവയ്ക്കുകയാണെന്നായിരുന്നു യൂറോളജി വിഭാഗം മേധാവി ഡോ.ഹാരിസ് ഹസന് വെളിപ്പെടുത്തിയത്. സര്ക്കാര് സംവിധാനങ്ങളിലെ വീഴ്ചയെക്കുറിച്ച് സമൂഹമാധ്യമത്തിലൂടെയാണു ഡോ.ഹാരിസ് തുറന്നടിച്ചത്. ശസ്ത്രക്രിയകള് മാറ്റിവയ്ക്കുന്നതില് ലജ്ജയും നിരാശയുമുണ്ടെന്നും കോളജ് മെച്ചപ്പെടുത്താന് ഓടിയോടി ക്ഷീണിച്ചുവെന്നും ഹാരിസ് പറഞ്ഞിരുന്നു.
ബ്യൂറോക്രസിയോട് ഏറ്റുമുട്ടാനില്ല, പിരിച്ചു വിട്ടോട്ടെ എന്നായിരുന്നു ഡോക്ടറുടെ വൈകാരിക കുറിപ്പ്. കുറിപ്പ് വിവാദമായതിനു പിന്നാലെ പോസ്റ്റ് പിന്വലിച്ചിരുന്നു.
