തിരുവനന്തപുരം: സംസ്ഥാനത്ത് ഇന്ന് ഒൻപത് ജില്ലകളിൽ യെല്ലോ അലർട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, മലപ്പുറം, വയനാട് ജില്ലകളിലാണ് ജാഗ്രത നിർദേശം.
നാളെ സംസ്ഥാനത്ത് എവിടെയും മഴ അലർട്ട് ഇല്ലെന്ന് കാലാവസ്ഥാ വകുപ്പ് അറിയിച്ചു. എന്നാൽ പത്തനംതിട്ട, ആലപ്പുഴ, കോട്ടയം, എറണാകുളം, മലപ്പുറം ജില്ലകളിൽ 31-ാം തീയതി വീണ്ടും യെല്ലോ അലർട്ട് പ്രഖ്യാപിച്ചിട്ടുണ്ട്.
തെക്കുപടിഞ്ഞാറൻ കാലവർഷം അടുത്ത ദിവസങ്ങളിൽ അറബിക്കടൽ, ബംഗാൾ ഉൾക്കടൽ, ലക്ഷദ്വീപ് മേഖലകൾ ഉൾപ്പെടെ വ്യാപിക്കാൻ അനുകൂല സാഹചര്യമാണെന്നും കാലാവസ്ഥാ വകുപ്പ് അറിയിച്ചു. വിവിധ പ്രദേശങ്ങളിലായി ചക്രവാതച്ചുഴികൾ നിലനിൽക്കുന്നതും മഴ ശക്തമാകാൻ കാരണമാകുന്നുവെന്ന് റിപ്പോർട്ടിൽ പറയുന്നു.
മെയ് 29, 31, ജൂൺ 1, 2 തീയതികളിൽ കേരളം, മാഹി, ലക്ഷദ്വീപ് പ്രദേശങ്ങളിൽ ഒറ്റപ്പെട്ട ശക്തമായ മഴയ്ക്ക് സാധ്യതയുണ്ട്. ഈ ദിവസങ്ങളിൽ ഇടിമിന്നലോടും ശക്തമായ കാറ്റോടും കൂടിയ വ്യാപകമായ നേരിയതോ മിതമായതോ ആയ മഴയ്ക്കും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി.
