കോട്ടയം: ജൂബിലി തിരുനാളിനോടനുബന്ധിച്ച് സി.വൈ.എം.എൽ.ന്റെ ആഭിമുഖ്യത്തിൽ നടത്തിയ നാടകമേളയുടെ മത്സരഫലങ്ങൾ പ്രഖ്യാപിച്ചു. പ്രശസ്ത നാടകമായ ‘ഭഗത് സിംഗ് പുലിമല പി.ഒ.’ മികച്ച നാടകമായി തിരഞ്ഞെടുക്കപ്പെട്ടു. ‘കാഴ്ചബംഗ്ലാവ്’ ആണ് മികച്ച രണ്ടാമത്തെ നാടകമായി തിരഞ്ഞെടുക്കപ്പെട്ടത്.
മികച്ച സംവിധായകനുള്ള പുരസ്കാരം ‘ഭഗത് സിംഗ് പുലിമല പി.ഒ.’ എന്ന നാടകം സംവിധാനം ചെയ്ത സുരേഷ് ദിവാകരൻ കരസ്ഥമാക്കി. മികച്ച നടനായി ഇതേ നാടകത്തിലെ അഭിനയത്തിന് കണ്ണൂർ വാസൂട്ടി തിരഞ്ഞെടുക്കപ്പെട്ടു. ഗ്രീഷ്മ ഉദയ് ആണ് മികച്ച നടി. ‘താഴ്വാരം’ എന്ന നാടകത്തിലെ അഭിനയത്തിനാണ് ഗ്രീഷ്മയ്ക്ക് പുരസ്കാരം ലഭിച്ചത്. മികച്ച അവതരണത്തിനുള്ള അവാർഡ് ‘കാഴ്ചബംഗ്ലാവിന്’ ലഭിച്ചു.
സംഗീതം, രചന എന്നീ വിഭാഗങ്ങളിലും പുരസ്കാരങ്ങൾ പ്രഖ്യാപിച്ചു. ‘ആനന്ദഭൈരവി’ എന്ന നാടകത്തിലെ ഗാനങ്ങൾക്ക് ഈണം നൽകിയ അനിൽ മാള മികച്ച സംഗീതസംവിധായകനായി. ‘കാഴ്ചബംഗ്ലാവ്’ നാടകത്തിന്റെ രചയിതാവായ അനിൽ മാള തന്നെ മികച്ച രചയിതാവിനുള്ള പുരസ്കാരവും കരസ്ഥമാക്കി.
