കൊച്ചി: ലൈംഗികാതിക്രമ കേസിൽ അറസ്റ്റിലായി ജയിലിൽ കഴിയുന്ന സംവിധായകൻ രഞ്ജിത്തിന് ജാമ്യം. എറണാകുളം ഫസ്റ്റ് ക്ലാസ് മജിസ്ട്രേറ്റ് കോടതിയാണ് ഉപാധികളോടെ ജാമ്യം അനുവദിച്ചത്. ജാമ്യം അനുവദിച്ചാൽ പ്രതി സാക്ഷികളെ സ്വാധീനിക്കാമെന്നായിരുന്നു പ്രോസിക്യൂഷന്റെ വാദം. കേസിലെ പ്രധാന സാക്ഷികൾ പ്രതിയുടെ സിനിമയുമായി ബന്ധപ്പെട്ടവരായതിനാൽ, ജാമ്യം നൽകുന്നത് അന്വേഷണത്തെ ബാധിക്കുമെന്നും പ്രോസിക്യൂഷൻ കോടതിയിൽ അറിയിച്ചു.
എന്നാൽ സാക്ഷികളെ സ്വാധീനിക്കില്ലെന്നും, അവരുമായി ബന്ധപ്പെടില്ലെന്നും രഞ്ജിത്ത് കോടതിയിൽ ഉറപ്പ് നൽകി. ചികിത്സയിലായതിനാൽ ഡോക്ടർ നിർദേശിച്ച മരുന്നുകൾ തുടരുന്നുണ്ടെന്നും, അന്വേഷണവുമായി പൂർണ്ണമായി സഹകരിക്കുമെന്നും ആവശ്യമായപ്പോൾ അന്വേഷണ ഉദ്യോഗസ്ഥന്റെ മുന്നിൽ ഹാജരാകുമെന്നും അദ്ദേഹം വ്യക്തമാക്കി.
യുവനടിയുടെ പരാതിയെ തുടർന്നാണ് കേസ് രജിസ്റ്റർ ചെയ്തത്. ജനുവരി 9ന് ഫോർട്ട് കൊച്ചിയിലെ സിനിമാ ചിത്രീകരണ സ്ഥലത്ത് വെച്ച് പീഡിപ്പിക്കാൻ ശ്രമിച്ചെന്നാണ് പരാതി. സംവിധായകനെ കാണാനായി കാരവാനിൽ കയറിയപ്പോൾ സംഭവമുണ്ടായതായും പരാതിയിൽ പറയുന്നു. ഇടുക്കി എസ്.പി.യുടെ നിർദേശപ്രകാരം തൊടുപുഴയിൽ വെച്ച് വാഹനമടക്കി രഞ്ജിത്തിനെ കസ്റ്റഡിയിലെടുക്കുകയായിരുന്നു. കേസിൽ അന്വേഷണം തുടരുകയാണ്.
