പകൽ മുഴുവൻ ഊർജ്ജസ്വലമായിരിക്കാൻ ഒരു വ്യക്തിക്ക് രാത്രിയിൽ ഏഴു മുതൽ എട്ടു മണിക്കൂർ വരെയുള്ള ഉറക്കം അത്യാവശ്യമാണ്. എന്നാൽ പലരും പരാതിപ്പെടുന്ന പ്രധാന പ്രശ്നമാണ് എട്ട് മണിക്കൂർ കൃത്യമായി ഉറങ്ങിയിട്ടും രാവിലെ എഴുന്നേൽക്കുമ്പോൾ കടുത്ത ക്ഷീണവും മടിയും അനുഭവപ്പെടുന്നു എന്നത്. നാം എത്ര സമയം ഉറങ്ങുന്നു എന്നതിനേക്കാൾ പ്രധാനമാണ് എങ്ങനെയുള്ള ഉറക്കമാണ് ലഭിക്കുന്നത് എന്ന് ആരോഗ്യ വിദഗ്ദ്ധർ ചൂണ്ടിക്കാണിക്കുന്നു. ആവശ്യത്തിന് ഉറങ്ങിയിട്ടും ചിലപ്പോൾ എട്ട് മണിക്കൂർ കിടക്കയിൽ കണ്ണടച്ച് കിടന്നിട്ടുണ്ടാകാം. എന്നാൽ പുറമേനിന്നുള്ള ശബ്ദം, മാനസിക സമ്മർദ്ദം, അല്ലെങ്കിൽ സുഖകരമല്ലാത്ത കിടപ്പുമുറി എന്നിവ കാരണം ഉറക്കം ഇടയ്ക്കിടെ തടസപ്പെടാൻ സാധ്യതയുണ്ട്. ഇത്തരം ആഴമില്ലാത്ത ഉറക്കം ശരീരം പൂർണ്ണമായി വിശ്രമിക്കുന്നതിനെ തടയുകയും രാവിലെ കടുത്ത ക്ഷീണത്തിന് കാരണമാവുകയും ചെയ്യും. വിട്ടുമാറാത്ത ക്ഷീണം അനുഭവപ്പെടുന്നതിന് പിന്നിൽ നിരവധി പ്രധാന കാരണങ്ങളാണുള്ളത്.

രാത്രി വൈകി മൊബൈൽ ഫോണുകളോ ലാപ്‌ടോപ്പോ ഉപയോഗിക്കുന്നത് ഇന്ന് പലരുടെയും ശീലമാണ്. ഈ സ്ക്രീനുകളിൽ നിന്നുമുള്ള ‘ബ്ലൂ ലൈറ്റ്’ തലച്ചോറിനെ ശാന്തമാകാൻ അനുവദിക്കില്ല. ഇത് ശരീരത്തിന്റെ സ്വാഭാവിക ഉറക്കചക്രത്തെ ബാധിക്കുന്നതിനാൽ, എത്ര ഉറങ്ങിയാലും രാവിലെ ഉണരുമ്പോൾ ഒട്ടും ഫ്രഷ്നസ്സ് തോന്നുകയില്ല. ഓഫീസിലെ ജോലിഭാരം, അമിത ചിന്ത, ആകുലതകൾ എന്നിവ മാനസികമായി നമ്മെ തളർത്താറുണ്ട്. ശരീരം കിടക്കയിൽ വിശ്രമിക്കുമ്പോഴും മനസ് അമിതമായി പ്രവർത്തിച്ചുകൊണ്ടിരിക്കുന്നത് ഉറക്കത്തിന്റെ ആഴം കുറയ്ക്കും. ശരീരത്തിൽ ആവശ്യത്തിന് വെള്ളമില്ലാത്ത അവസ്ഥയായ നിർജ്ജലീകരണവും എപ്പോഴും ക്ഷീണം തോന്നാൻ ഇടയാക്കും. കൂടാതെ, രാത്രി വൈകി കനത്ത ആഹാരം കഴിക്കുന്നതും ഉറങ്ങാൻ പോകുന്നതിന് തൊട്ടുമുമ്പ് ചായ, കാപ്പി എന്നിവ കുടിക്കുന്നതും ഉറക്കത്തെ ദോഷകരമായി ബാധിക്കും. ശരീരത്തിൽ ഉണ്ടാകുന്ന വിറ്റാമിൻ B12, വിറ്റാമിൻ ഡി, അയൺ എന്നിവയുടെ കുറവും വിട്ടുമാറാത്ത ഇത്തരം ക്ഷീണത്തിന് വലിയൊരു കാരണമാകാറുണ്ട്.

കുറഞ്ഞ ഉറക്കം പോലെ തന്നെ ശരീരത്തിന് ദോഷകരമാണ് അമിത ഉറക്കവും. ആവശ്യത്തിലധികം ഉറങ്ങുന്നതും കൃത്യമായ സമയക്രമം പാലിക്കാതെ ഉറങ്ങുന്നതും ശരീരത്തിന്റെ ജൈവഘടികാരത്തെ തെറ്റിക്കുകയും ദിവസം മുഴുവൻ മടുപ്പ് തോന്നിപ്പിക്കുകയും ചെയ്യും. എട്ടുമണിക്കൂർ ഉറങ്ങിയിട്ടും ദിവസവും എഴുന്നേൽക്കുന്ന സമയത്ത് കടുത്ത ക്ഷീണം അനുഭവപ്പെടുന്നുണ്ടെങ്കിൽ അതിന് പിന്നിൽ ‘സ്ലീപ്പ് അപ്നിയ’ അഥവാ ഉറക്കത്തിൽ ശ്വാസമെടുക്കാൻ ബുദ്ധിമുട്ടുന്ന അവസ്ഥ, അല്ലെങ്കിൽ ‘ഇൻസോമ്നിയ’ പോലുള്ള ഉറക്കവുമായി ബന്ധപ്പെട്ട ഗുരുതരമായ രോഗങ്ങളുമാകാം.

ഇത്തരം പ്രശ്നങ്ങൾ പരിഹരിക്കാൻ ചില കാര്യങ്ങൾ പ്രത്യേകം ശ്രദ്ധിക്കേണ്ടതുണ്ട്. എല്ലാ ദിവസവും കൃത്യസമയത്ത് ഉറങ്ങാനും ഉണരാനും ശ്രദ്ധിക്കുക, ഉറങ്ങുന്നതിന് ഒരു മണിക്കൂർ മുമ്പെങ്കിലും ഫോൺ ഉപയോഗം പൂർണ്ണമായി ഒഴിവാക്കുക, കിടപ്പുമുറി ശാന്തവും ഇരുണ്ടതുമായി സൂക്ഷിക്കുക, പകൽ സമയങ്ങളിൽ നന്നായി വെള്ളം കുടിക്കുക എന്നിവ ശീലമാക്കണം. ചുരുക്കത്തിൽ, ഉറക്കത്തിന്റെ ദൈർഘ്യം പോലെ തന്നെ പ്രധാനമാണ് അതിന്റെ ഗുണനിലവാരവും. എട്ട് മണിക്കൂർ ഉറങ്ങിയിട്ടും വിട്ടുമാറാത്ത ക്ഷീണം തോന്നുന്നുവെങ്കിൽ അത് ശരീരം തരുന്ന ഒരു മുന്നറിയിപ്പായി കാണണം. ഉറങ്ങുന്നതിന് മുൻപുള്ള ചെറിയ തെറ്റായ ശീലങ്ങൾ മാറ്റിവെക്കുകയും, ആരോഗ്യകരമായ ജീവിതശൈലി സ്വീകരിക്കുകയും ചെയ്താൽ ഒരു പരിധി വരെ ഈ പ്രശ്നം പരിഹരിക്കാം. എന്നാൽ ശീലങ്ങളിൽ മാറ്റം വരുത്തിയിട്ടും ആഴ്ചകളോളം ക്ഷീണം തുടരുകയാണെങ്കിൽ, ഒരു ഡോക്ടറുടെ സഹായത്തോടെ അതിന്റെ യഥാർഥ കാരണം കണ്ടെ