ഒരു കോടി 38 ലക്ഷം ലിറ്റർ വെള്ളം സൂക്ഷിച്ചിരുന്ന ഭീമൻ ടാങ്ക് പൊളിഞ്ഞുവീണ് പ്രദേശം മുഴുവൻ വെള്ളത്തിൽ മുങ്ങിയപ്പോൾ, അത് പ്രകൃതിദുരന്തമല്ലെന്നത് നാം മനസ്സിലാക്കണം. മഴയെയോ, അപ്രതീക്ഷിതമായ സംഭവങ്ങളെയോ കുറ്റപ്പെടുത്തിക്കൊണ്ട് ന്യായീകരിക്കാൻ കഴിയാത്ത മനുഷ്യ പിഴവാണ് ഇതിന് പിന്നിൽ. വർഷങ്ങളായി പരിചരണമില്ലാതെ നിലനിന്ന പൊതു സംവിധാനങ്ങൾ എത്ര അപകടകരമാണെന്ന് ഈ സംഭവം തുറന്നു കാട്ടുന്നു. കൊച്ചിപോലുള്ള ജനസാന്ദ്രമായ നഗരത്തിൽ ഇത്തരമൊരു സംവിധാനത്തിലെ വീഴ്ച, മനുഷ്യജീവിതത്തോടുള്ള പൂർണ്ണ അനാസ്ഥ മാത്രമാണ്.

മഴയുടെ തീവത്ര ഒരോ വട്ടവും വർ​ദ്ധിക്കുമ്പോൾ അത് മുല്ലപെരിയാറിലെ മാത്രമല്ല കേരളത്തിലെ മുഴുവൻ ജനതയെയും ആശങ്കയിലാക്കുന്ന ഒന്നാണ് . മഴ പെയ്യുമ്പോൾ മാത്രം കണ്ണുതുറക്കുന്ന അതേ സർക്കാർ, വർഷങ്ങളായി പരിശോധനയോ നവീകരണമോ ചെയ്യാത്ത ടാങ്കുകൾക്ക് മുന്നിൽ കണ്ണടച്ചിരിക്കുകയാണ്. ദുരന്തം കഴിഞ്ഞ് പ്രതിപക്ഷം-ഭരണകക്ഷി വിലയിരുത്തലുകൾ തുടങ്ങും, പക്ഷേ ജനങ്ങളുടെ സുരക്ഷ ഉറപ്പാക്കാനുള്ള സുസ്ഥിര നടപടികൾ എപ്പോഴാണ് തുടങ്ങുന്നത് എന്നതാണ് യഥാർത്ഥ ചോദ്യം.

മാത്രമല്ല, കൊച്ചി നഗരത്തിന്റെ ഏകദേശം 35 ശതമാനം ഭാഗങ്ങൾക്കും ജലവിതരണം നടത്തുന്നത് തമ്മനം ഭൂതല ജലസംഭരണിയിലൂടെയാണ്. ഈ സംഭരണിയിൽ ഉണ്ടായ വിള്ളൽ രണ്ടുദിവസമായി നഗരത്തെ ഗുരുതരമായ ജല പ്രതിസന്ധിയിലാക്കിയിരിക്കുകയാണ്.തകരാർ എങ്ങനെ സ്ഥിരമായി പരിഹരിക്കാമെന്ന കാര്യത്തിൽ ഇതുവരെ വ്യക്തതവരുത്തിയിട്ടില്ല. പതിനായിരക്കണക്കിന് ആളുകൾക്കു ശുദ്ധജലത്തിന് ഇതല്ലാതെ മറ്റൊരു വഴിയില്ലാത്ത സാഹചര്യത്തിൽ ജലവിതരണം പൂർണതോതിൽ പുനരാരംഭിക്കാൻ ഒട്ടും വൈകിക്കൂടാ.

തമ്മനത്ത് പൊട്ടിയ ജലടാങ്ക് 1984-85 കാലഘട്ടത്തിലാണ് നിർമ്മിച്ചത്. സാധാരണയായി കോൺക്രീറ്റ് വാട്ടർ ടാങ്കുകൾക്ക് 40 മുതൽ 50 വർഷം വരെ ആയുസ് മാത്രമേ ഉണ്ടാകൂ. അതിനാൽ പുതിയ ടാങ്ക് നിർമിക്കുകയാണ് ഏറ്റവും ഉചിതം

ജലവിതരണം സംബന്ധിച്ച സമാന പ്രതിസന്ധിവേളകളിൽ നമ്മുടെ പല നഗരങ്ങളിലും പകരം സംവിധാനം ഏർപ്പെടുത്താതെയും പ്രശ്നപരിഹാരം വൈകിച്ചുമുള്ള ദുരനുഭവങ്ങൾ ഉണ്ടായിട്ടുണ്ട്. അതുകൊണ്ട് തന്നെ കൊച്ചി നഗരത്തിലെ ജനജീവിതത്തെ നേരിട്ട് ബാധിക്കുന്ന ഇപ്പോഴത്തെ ജലവിതരണ പ്രതിസന്ധി എത്രയും വേഗം പൂർണമായി പരിഹരിക്കേണ്ടതാണ്. ഈ പ്രശ്നത്തിന്റെ വ്യാപ്തി വളരെ വലുതായതിനാൽ, സർക്കാരിന്റെ ഇടപെടൽ ഉണ്ടായാൽ മാത്രമേ കാര്യങ്ങൾ വേഗത്തിൽ മുന്നോട്ട് പോകാൻ സാധിക്കൂ.

തൃതല പഞ്ചായത്ത് തിരഞ്ഞെടുപ്പും നിയമസഭാ തെരഞ്ഞെടുപ്പും പടിവാതിൽക്കൽ എത്തിനിൽക്കുന്ന ഈ സമയത്ത് ഉദ്യോഗസ്ഥരുടെയും ഭരണപക്ഷത്തിന്റെയും ഈ അനാസ്ഥ തിരിച്ചടിയാകും എന്നുള്ള കാര്യത്തിൽ സംശയമില്ല.

അതുകൊണ്ടുതന്നെ തെരഞ്ഞെടുപ്പ് മുമ്പിൽ കണ്ടുകൊണ്ടുള്ള അടിയന്തരമായി ഇടപെടൽ ഭരണകക്ഷിയിൽ നിന്നും ഉണ്ടായിട്ടില്ലെങ്കിൽ അത് പഞ്ചായത്ത് തിരഞ്ഞെടുപ്പിൽ വലിയ തിരിച്ചടിയാകും.