റാഞ്ചി: ഝാര്ഖണ്ഡിലെ ബൊക്കാറോ ജില്ലയിലുണ്ടായ ഏറ്റുമുട്ടലില് എട്ട് മാവോവാദികളെ വധിച്ചു. സിആര്പിഎഫും ബൊക്കാറോ ജില്ലാ പൊലീസും ചേര്ന്നായിരുന്നു ദൗത്യം നടത്തിയത്. മാവോവാദികളില്നിന്ന് ആയുധങ്ങള് കണ്ടെടുത്തതായി അധികൃതര് അറിയിച്ചു. പ്രദേശത്ത് തിരച്ചില് തുടരുകയാണ്.
പുലര്ച്ചെ 5.30-ഓടെ ലാല്പാനിയ പ്രദേശത്തെ ലുഗു മലനിരകളില് പരിശോധനയ്ക്കിടെയാണ് വെടിവെപ്പ് ആരംഭിച്ചതെന്നാണ് വിവരം. എ.കെ. സീരിസില്പ്പെടുന്ന റൈഫിള്, പിസ്റ്റല്, എസ്എല്ആര് മൂന്ന് ഇന്സാസ് റൈഫിള് എന്നിവ ഇവരുടെ പക്കല്നിന്ന് കണ്ടെടുത്തതായാണ് പുറത്ത് വരുന്ന വാര്ത്തകള്.
തലക്ക് ഒരു കോടി രൂപ വിലയിട്ടിരുന്ന വിവേക് എന്ന മാവോവാദിയും കൊല്ലപ്പെട്ടതായി എഎന്ഐ റിപ്പോര്ട്ട് ചെയ്യുന്നു. കൂടുതല് വിവരങ്ങള് പുറത്തുവന്നിട്ടില്ല. പ്രദേശത്ത് കൂടുതല് മാവോവാദികള് ഉണ്ടോ എന്ന് പരിശോധിച്ചുവരികയാണ്.
