ന്യൂഡൽഹി: മെറ്റയുടെ ഉടമസ്ഥതയിലുള്ള സാമൂഹിക മാധ്യമ പ്ലാറ്റ്‌ഫോമായ ഫേസ്ബുക്കിൽ സാങ്കേതിക തകരാർ റിപ്പോർട്ട് ചെയ്തു. ഇന്ന് ഉച്ചയോടെയാണ് പ്രശ്നം വ്യാപകമായി ശ്രദ്ധയിൽപ്പെട്ടത്. പ്രധാനമായും ഡെസ്‌ക്ടോപ്പ് പതിപ്പിലാണ് തകരാർ അനുഭവപ്പെടുന്നതെന്നാണ് റിപ്പോർട്ടുകൾ. നിരവധി ഉപയോക്താക്കൾക്ക് ഫേസ്ബുക്ക് തുറക്കാനോ ഉപയോഗിക്കാനോ സാധിക്കുന്നില്ലെന്ന് പരാതിയുണ്ട്.

“നിങ്ങളുടെ അക്കൗണ്ട് താൽക്കാലികമായി ലഭ്യമല്ല. സൈറ്റിലെ പ്രശ്നം കാരണമാണ് ഇത്. അത് ഉടൻ പരിഹരിക്കപ്പെടും. കുറച്ച് മിനിറ്റുകൾക്ക് ശേഷം വീണ്ടും ശ്രമിക്കുക” എന്ന സന്ദേശമാണ് പലർക്കും ലഭിക്കുന്നത്.

അതേസമയം, സേവന തകരാർ സംബന്ധിച്ച പരാതികൾ വർധിച്ചതായി ഡൗൺഡിറ്റക്ടർ വെബ്‌സൈറ്റിലെ വിവരങ്ങളും സൂചിപ്പിക്കുന്നു. ഞായറാഴ്ച രാവിലെ മുതൽ തന്നെ ‘Facebook Down’ എന്ന തിരച്ചിലിൽ വലിയ വർധനവാണ് രേഖപ്പെടുത്തിയത്. തകരാറിന്റെ കാരണം സംബന്ധിച്ച് മെറ്റ ഇതുവരെ ഔദ്യോഗിക വിശദീകരണം നൽകിയിട്ടില്ല.