ഉത്തരാഖണ്ഡില് ഇന്ന് മുതല് ഏകീകൃത സിവില് കോഡ് (യു.സി.സി) നടപ്പിലാക്കും. ഇതോടെ സ്വാതന്ത്ര്യത്തിന് ശേഷം ഏക സിവില് കോഡ് നടപ്പാക്കുന്ന ഇന്ത്യയിലെ ആദ്യ സംസ്ഥാനമായി ഉത്തരാഖണ്ഡ് മാറും. ഇനി മുതല് വിവാഹം, വിവാഹമോചനം, സ്വത്തവകാശം, പിന്തുടര്ച്ചാവകാശം മുതലായവയില് സംസ്ഥാനത്തെ എല്ലാവര്ക്കും ഏകീകൃത നിയമം ആയിരിക്കും. വിവാഹം ഉള്പ്പടെയുള്ളവ രജിസ്റ്റര് ചെയ്യാനുള്ള യു.സി.സി വെബ്സൈറ്റ് ഇന്ന് ഉച്ചക്ക് മുഖ്യമന്ത്രി പുഷ്കര് സിങ് ധാമി ഉദ്ഘാടനം ചെയ്യും.
യുണിഫോം സിവില് കോഡ് ഉത്തരാഖണ്ഡ് 2024 ബില് ഫെബ്രുവരി ഏഴിന് സംസ്ഥാന നിയമസഭയില് പാസാക്കി. രാഷ്ട്രപതിയുടെ അനുമതി ലഭിച്ചതിന് ശേഷം മാര്ച്ച് 12 ന് വിജ്ഞാപനം ചെയ്യുകയായിരുന്നു. നാല് സെക്ഷനുകളിലായി 182 പേജാണ് ബില്ലിനുള്ളത്.
ആദിവാസികളെയും ചില പ്രത്യേക സമുദായത്തെയും നിയമത്തിന്റെ പരിധിയില് നിന്ന് ഒഴിവാക്കിയിട്ടുണ്ട്. സംസ്ഥാനത്തിന് പുറത്ത് താമസിക്കുന്നവരും നിയമത്തിന് കീഴിലായിരിക്കും. ഏത് മതാചാര പ്രകാരം വിവാഹം നടന്നാലും 60 ദിവസത്തിനകം യു സി സി പോര്ട്ടലില് രജിസ്റ്റര് ചെയ്യണം. സ്ത്രീകള്ക്കും പുരുഷന്മാര്ക്കും തുല്യമായ സ്വത്തവകാശം, ലിവിംഗ് ടുഗെദര് രജിസ്ട്രേഷന്, എന്നിവയും നിയമത്തിന്റെ പരിധിയിലാണ്.
